Ермакова клянецца, што ўсе зберажэнні захоўвае ў рублях

Кіраўнік Нацбанка - адна з тых персон, да якіх у беларусаў заўсёды ёсць пытанні.

Нягледзячы на сваю занятасць, Надзея Ермакова знайшла час, каб адказаць чытачам газеты «СБ». У прыватнасці, яна запэўніла, што свае ўласныя зберажэнні захоўвае ў беларускай валюце.

«Свае зберажэнні ў асноўным захоўваю ў беларускіх рублях. А стаўка рэфінансавання не з'яўляецца адзіным паказчыкам, на які арыентуюцца банкі, калі выносяць стаўкі крэдытаў і дэпазітаў. На іх узровень уплывае цэлы шэраг іншых фактараў. Гэта ўзровень ліквіднасці ў банкаўскай сістэме і адсоткавых ставак у аперацыях Нацыянальнага банка, кошт міжбанкаўскіх крэдытаў, а таксама сітуацыя на валютным і дэпазітным рынках. Пры змене ўзроўню стаўкі рэфінансавання Нацыянальны банк улічвае неабходнасць як абмежавання інфляцыі, так і забеспячэння неабходных умоў для эканамічнага развіцця.

Сёлета па меры забеспячэння макраэканамічнай стабільнасці Нацбанк істотна звузіў калідор адсоткавых ставак у сваіх аперацыях з мэтай наблізіць іх узровень, а таксама ўзровень адсоткаў міжбанкаўскіх крэдытаў да стаўкі рэфінансавання. Гэта прывяло да зніжэння кошту грошай на крэдытна-дэпазітным рынку. Такім чынам, прымаюцца меры, каб стаўка рэфінансавання гуляла ключавую ролю ў адсоткавай палітыцы», - адказала яна на адно з пытанняў чытачоў.