«Грачаны» крызіс: Расея распачне стратэгічныя рэзервы

Гэтая крайняя мера прынятая праз тое, што раздробны кошт грэчкі з пачатку лістапада падняўся на 27,5%.

У Расеі раздробны кошт грэчкі з пачатку лістапада падняўся на 27,5%, цяпер дзяржава рыхтуецца да крайніх мераў, піша «Коммерсант».

Каб стабілізаваць кошт, урад абмяркоўвае распачынанне грачаных запасаў Расрэзэрваў. Мінсельгас не бачыць падстаў для панікі, запэўніваючы, што паводле вынікаў года дэфіцыту не будзе.

Амаль за тры тыдні сярэдні кошт грэчкі вырас да 45,86 руб за 1 кг. Павелічэнне кошту грэчкі апярэджвае рост індэкса спажывецкіх коштаў: з 11 да 17 лістапада гэты паказчык вырас на 0,3%, з пачатку месяца - на 0,7%.

Да адкрыцця рэзервовых запасаў улады РФ звяртаюцца вельмі рэдка, калі рост коштаў на той ці іншы прадукт першай неабходнасці дасягае крытычных значэнняў. Апошні раз чыноўнікі пагадзіліся распачаць Расрэзэрвы ў 2011 годзе, выпусціўшы на рынак блізу 300 тыс тон цукру-пяску. Тады ў краіне сярэдні кошт на гэты прадукт за паўгода вырас на 63%, да 41 руб за 1 кг. Прычынай гэтаму сталі анамальныя ўмовы надвор'я ў буракасейных раёнах.

Фота: ТАСС