64% украінцаў падтрымліваюць уваходжанне ў ЕЗ
5- 20.11.2014, 13:15
- 7,119
З красавіка ва Украіне назіраецца павелічэнне прыхільнікаў уваходжання ў ЕЗ і NATO.
Уваходжанне Украіны ў Еўрапейскі Звяз падтрымліваюць 64% апытаных украінцаў, за далучэнне да Мытнага саюза - 17%.
Пры гэтым 19% не вызначыліся ў гэтым пытанні. Пра гэта сведчаць вынікі апытання сацыялагічнай групы «Рэйтынг», паведамляе «Інтэрфакс-Україна».
«З красавіка 2014 назіраецца павелічэнне прыхільнікаў уваходжання ў ЕЗ (з 55% у красавіку да 64%) пры адначасовым скарачэнні прыхільнікаў МС (з 24% у красавіку да 17%). Уваходжанне ў ЕЗ падтрымлівае большасць апытаных на захадзе, поўначы, у цэнтры, на ўсходзе і поўдні краіны. Толькі на Данбасе большасць - за ўваходжанне Украіны ў Мытны саюз», - гаворыцца ў прэс-рэлізе «Рэйтынгу», апублікаваным у чацвер раніцай.
Амаль палова апытаных (48%) падтрымлівае ініцыятыву скасавання на заканадаўчым узроўні пазаблокавага статусу Украіны, каля траціны (28%) - супраць, чвэрць не вызначылася.
Калі б сёння праводзіўся рэферэндум аб уваходжанні Украіны ў NATO, палова апытаных (51%) прагаласавала б за, 25% - супраць. Чвэрць апытаных не вызначылася ці не брала б удзелу ў рэферэндуме.
«Пачынаючы з красавіка гэтага года колькасць прыхільнікаў уваходжання ў NATO пастаянна ўзрастае. У лістападзе зафіксаваны найвышэйшы ўзровень яго падтрымкі (40% у красавіку да 51%) пры адначасовым зніжэнні колькасці праціўнікаў уваходжання (з 46% у красавіку да 25%). Больш за ўваходжанне ў NATO падтрымліваюць жыхары захаду, поўначы і цэнтра. На ўсходзе прыкладна роўная колькасць прыхільнікаў і праціўнікаў NATO, на поўдні і на Данбасе - больш праціўнікаў», - кажуць сацыёлагі.
Сацыялагічнае даследаванне праводзілася ў фармаце «face-to-face» з 6 да 13 лістапада. Апытана 2 тысячы рэспандэнтаў ад 18 гадоў і старэй. Выбарка рэпрэзентатыўная па ўзросту, полу, рэгіёнам і тыпу паселішча. Хібнасць рэпрэзентатыўнасці даследавання - не больш за 2,8%.