Трагедыя на Гая ў Менску: у кіроўцы Audi A8 здарыўся востры псіхоз

Гэта стан гіпатэтычна можа ўзнікнуць у кожнага чалавека - самага адэкватнага, ураўнаважанага і паспяховага.

Раніцай 8 лістапада на сталічнай вуліцы Гая 38-гадовы мужчына на Audi A8 урэзаўся ў Audi 100: у "сотцы" загінулі два чалавекі. Пазней стала вядома, што перад аварыяй ён нанёс мноства нажавых раненняў сваёй жонцы і двум маленькім дзецям. Трохгадовы малы балансаваў на мяжы жыцця і смерці, але дзякуючы намаганням лекараў выжыў. 20 лістапада абодва дзіцяці выпісаныя з лякарні, піша tut.by.

Дзеянні падазраванага кваліфікаваныя паводле ч.1 арт.14 і ч.2 арт.139 (Замах на забойства, учыненае пры абцяжваючых абставінах) і ч. 3 арт. 317 (Парушэнне правілаў дарожнага руху, што пацягнула па неасцярожнасці смерць двух асоб) КК РБ. Цяпер у дачыненні да яго праводзіцца стацыянарная псіхолага-псіхіятрычная экспэртыза.

Як стала вядома, пасля ўчынення першага злачынства - замаху на забойства сваёй сям'і (дарэчы, крымінальная справа паводле такога артыкула можа быць распачатая толькі ў выпадку, калі маюцца падставы меркаваць намер менавіта на забойства - прасцей кажучы, тое, што людзі выжылі, адбылося насуперак жаданню злачынцы) - 38-гадовы мужчына ўчыніў няўдалую спробу суіцыду: спрабаваў нажом перарэзаць сабе горла. Пасля гэтага ён сеў у аўтамабіль і разагнаўся да хуткасці каля 150 км/г - магчыма, збіраючыся скончыць з сабой такім спосабам (разбіўшыся нааўтамабілі). Пасля ўчынення смяротнага ДТЗ мужчына накіраваўся дадому, дзе і быў затрыманы - меркавана, ён збіраўся ўзяць ключы ад другога сямейнага аўтамабіля, Volvo XC90 жонкі, каб паўтарыць спробу.

Псіхолага-псіхіятрычная экспэртыза доўжыцца 30 дзён: судовыя экспэрты працуюць не толькі непасрэдна з падазраванымі асобамі, але і вывучаюць медыцынскі анамнез і абставіны справы. Як паведамілі парталу крыніцы, блізкія да следства, наяўная на сённяшні дзень інфармацыя дазваляе меркаваць, што ў 38-гадовага мужчыны здарыўся востры псіхоз - ёсць шэраг фактараў, якія на гэта паказваюць. Гэта стан гіпатэтычна можа ўзнікнуць у кожнага чалавека - самага адэкватнага, ураўнаважанага, паспяховага і г.д. Ён можа быць кароткачасовым.

Экспэртыза яшчэ не скончаная - звесткі толькі папярэднія. Заключэнне будзе гатовае не раней за сярэдзіну снежня - мяркуючы па тым, што яго пачалі не раней за 11 лістапада. І ў яго выніках будзе ўсталяваны факт наяўнасці свядомасці або непрытомнасці мужчыны ў момант учынення злачынстваў. Аднак прызнанне наяўнасці адсутнасці свядомасці - гэта выключная кампетэнцыя суда. Суд можа не пагадзіцца з заключэннем судова-псіхіятрычнай экспэртызы і прызначыць паўторную экспэртызу.