Пуцін баіцца «каляровай рэвалюцыі» ў Расеі

Прэзідэнт РФ Уладзімір Пуцін выступіў на пасяджэнні Рады бяспекі Расеі.

Прэзідэнт Расеі Уладзімір Пуцін заклікаў улічыць урокі так званых "каляровых рэвалюцый" у іншых краінах, каб падобны сцэнар не паўтарыўся ў Расеі, паведамляе ТАСС. Выступаючы на пасяджэнні Рады бяспекі Расеі, дзе разглядалася дзяржаўная канцэпцыя процідзеяння экстрэмізму, Пуцін падкрэсліў, што барацьба з экстрэмістамі не з'яўляецца барацьбой з іншадумствам, піша NEWSru.com.

"Экстрэмізм нясе пагрозу нацыянальнай бяспецы, здольны кардынальна разбалансаваць палітычную, эканамічную і сацыяльную сістэмы. Найбольш небяспечны для грамадства і дзяржавы такі выгляд экстрэмізму, як нацыяналізм, рэлігійная нецярпімасць, палітычны экстрэмізм", - выступіў перад чальцамі Рады бяспекі расейскі лідар.

"У сучасным свеце экстрэмізм выкарыстоўваецца як інструмент геапалітыкі і перадзелу сфер уплыву; мы бачым, да якіх трагічных наступстваў прывяла хваля так званых "каляровых рэвалюцый", якія ўзрушэнні выпрабавалі і адчуваюць народы краін, якія прайшлі праз безадказныя эксперыменты падспуднага, а часам і грубага, як у нас кажуць, ламавога знешняга ўмяшання ў іх жыццё", - заявіў прэзідэнт РФ.

"Мы абавязаныя зрабіць усё неабходнае, каб такое ніколі не здаралася ў Расеі", - падкрэсліў ён.

Пры гэтым Пуцін запэўніў, што барацьба з экстрэмізмам у РФ не мае нічога агульнага з барацьбой з іншадумствам. "Супрацьдзеянне экстрэмізму не мае нічога агульнага з барацьбой з іншадумствам. У нас свабодная дэмакратычная краіна. І яе грамадзяне маюць права мець сваё меркаванне і выказваць гэта меркаванне. Маюць права быць у апазіцыі да ўлады", - заявіў Пуцін, дадаўшы, што ўсе палітычныя сілы маюць права змагацца за ўладу ў рамках закона.

Пры гэтым прэзідэнт РФ папярэдзіў, што за экстрэмізм прыйдзецца адказваць па ўсёй строгасці закона. "Адстойваючы свабоду выбару, сходаў, шэсцяў, мітынгаў, нельга забываць аб адказнасці за свае словы і свае дзеянні", - падкрэсліў ён.

"Неабходна ведаць і разумець, што распальванне канфліктаў паміж людзьмі розных нацыянальнасцей і веравызнанняў, прапаганда нацыяналістычнай ідэалогіі, масавыя парушэнні грамадскага парадку на гэтай глебе, заклікі да гвалтоўнага звяржэння існага ладу - гэта прамая праява антынароднага мыслення, гэта прамыя праявы экстрэмізму, - дадаў Пуцін. - За такія дзеі давядзецца адказваць".

"Пакаранне за распаўсюджванне экстрэмісцкіх ідэй і за дзеянні экстрэмісцкага характару павіннае быць няўхільным", - падкрэсліў ён.

На думку прэзідэнта, "незаконная міграцыя - гэта пажыўнае асяроддзе" для экстрэмізму і злачыннасці. У сувязі з гэтым Пуцін заклікаў узмацніць кантроль за выкананнем правілаў знаходжання мігрантаў у Расеі, паведамляе "Інтэрфакс". "Вядома, што незаконная міграцыя - гэта пажыўнае асяроддзе для злачыннасці, узнікнення міжэтнічнай напружанасці і праяў экстрэмізму. Неабходна ўзмацніць кантроль за выкананнем правіл знаходжання мігрантаў у Расеі, на справе займацца іх сацыяльнай і культурнай адаптацыяй, абаронай працоўных і іншых праў", - сказаў Пуцін .

На пасяджэнні Рады бяспекі Пуцін падкрэсліў, што асабліва экстрэмізм "набірае сілу ў інтэрнэце". Паводле ягоных слоў, прапаганда экстрэмізму накіраваная перш за ўсё на моладзь. "Ідэалогія экстрэмізму набірае сілу ў віртуальнай прасторы. Прычым набірае, літаральна "выстрэльваючы" ў рэальнае жыццё", - падкрэсліў прэзідэнт.

"Менавіта ў маладзёжным асяроддзі лідары экстрэмісцкіх арганізацый спрабуюць вербаваць сваіх паслядоўнікаў, весці прапаганду, перш за ўсё праз сусветную сетку інтэрнэту", - дадаў Пуцін.

Ён адзначыў, што праца з моладдзю з'яўляецца адным з прыярытэтаў у стратэгіі процідзеяння экстрэмізму, і заклікаў звярнуць сур'ёзную ўвагу на прафілактыку экстрэмізму. "Стратэгія процідзеяння экстрэмізму ўтрымлівае цэлы комплекс задач, накіраваных на арганізацыю вольнага часу моладзі, выхаванне пачуццяў патрыятызму, уменне супрацьстаяць сацыяльна небяспечным паводзінам", - сказаў ён.

Заўважым, што пра ўзмацненне кантролю за інтэрнэтам размовы, па ўсёй бачнасці, не ідзе. У пачатку кастрычніка на пасяджэнні Рады бяспекі РФ Пуцін паабяцаў, што Расея не будзе абмяжоўваць доступ у інтэрнэт і ставіць яго пад кантроль.

"Мы не маем намеру абмяжоўваць доступ у сетку, ставіць яе пад татальны кантроль, адзяржаўліваць інтэрнэт, абмяжоўваць законныя інтарэсы і магчымасці людзей, грамадскіх арганізацый, бізнесу ў інфармацыйнай сферы", - казаў Пуцін.

Прэзідэнт Уладзімір Пуцін лічыць, што стратэгія барацьбы з экстрэмізмам павінна стаць базавым і рабочым дакументам. "Прадстаўлены праект стратэгіі падрыхтаваны з улікам выклікаў, якія стаяць перад Расеяй, гэты дакумент разлічаны на працяглую перспектыву і павінен стаць базавым для ўсіх галін і ўзроўняў улады", - указаў кіраўнік дзяржавы.

На ягоную думку, "адна з найважнейшых задач - стварэнне абстаноўкі грамадскага непрымання, умацаванне грамадзянскага імунітэту да распаўсюджвання экстрэмісцкіх, радыкальных ідэй".

Пуцін удакладніў, што "для дасягнення гэтых мэт неабходна аб'яднаць намаганні дзяржавы, грамадства, усіх дзяржаўных і грамадскіх арганізацый". Ён дадаў, што стратэгія павінная стаць "узважаным, прадуманым дакументам, такім, якім можна было б кіравацца ў практычным жыцці".