Раман Кузнер: Удзел Польшчы ў перамовах што да Данбасу - гарантыя іх поспеху
- 21.11.2014, 15:45
- 6,805
Польшча павінна ўдзельнічаць у перамовах ва ўрэгуляванні сітуацыі на ўсходзе Украіны.
Пра гэта заявіў дарадца прэзідэнта Браніслава Камароўскага ў міжнародных справах, прафесар Раман Кузнер у інтэрв'ю Polskie radio.
- Удзел Польшчы з'яўляецца гарантыяй добрасумленнага, сумленнага падыходу да перамоваў у спыненні расейскай агрэсіі ва Украіне - сказаў ён.
Раман Кузнер пры гэтым звярнуў аднак увагу на факт, што Польшча павінна браць удзел у такіх перамовах, якія даюць надзеі на рэальныя змены.
- Цяпер Нямеччына і Расея робяць толькі выгляд перамоваў і гэта не час для далучэння да іх Польшчы - падкрэсліў ён.
Палітык мяркуе, што канцлерка ФРГ Ангела Мэркель ужо не верыць Уладзіміру Пуціну.
- Прэзідэнту Пуціну нельга давяраць, бо ён на працягу ўжо многіх месяцаў паказвае, што яго тактыка ў дачыненнях з ЕЗ і заходнімі краінамі - гэта падман, фальш, стварэнне двайной рэальнасці. Ён не з'яўляецца сур'ёзным партнёрам для перамоваў. - Заўважыў дарадца польскага прэзідэнта. - Я не дзіўлюся вострым словам Ангелы Мэркель, якая доўгі час мела надзеі, што Расея - гэта партнёр для перамоваў.