Падрабязнасці ўцёкаў з суда ў Менску: На канвой напалі два браты

Да артыкула «Махлярства ў асабліва буйным памеры» дадаўся і артыкул «Уцёкі»

Пасля чарговага судовага паседжання двух родных братоў у кайданках вывелі з залы суда Савецкага раёна, адвялі ў пакой канваіраў на першым паверсе, адкуль павінны былі павезці ў ізалятар. Але ў гэты момант адбылося надзвычайнае здарэнне. Браты напалі на канваіраў і паспрабавалі збегчы. Аднак міліцыянты хутка спынілі спробу ўцёкаў, піша «Комсомольская правда в Беларуси».

- У той дзень (чацвер 20 лістапада) у судзе разглядалася крымінальная справа паводле ч. 4 арт. 209 КК «Махлярства ў асабліва буйным памеры». Спрэчкі бакоў адбыліся, і бліжэйшым часам павінен быў быць абвешчаны прысуд, - распавёў Эдуард Якубоўскі, намеснік старшыні суда ў крымінальных справах Савецкага раёна Менска.

Каго падманулі родныя браты, у судзе не распавядаюць. Пакаранне за махлярства ім пагражала сур'ёзнае: ад 3 да 10 гадоў з канфіскацыяй маёмасці. Але цяпер ім давядзецца адказваць яшчэ і за ўцёкі. У дачыненні да братоў можа быць распачатая крымінальная справа паводле ч. 2 арт. 413 КК «Уцёкі з-пад варты, здзейсненыя групай асоб з прымяненнем гвалту».

Беларускія злачынцы ўцякаюць ад канваіраў вельмі рэдка. Самы дзёрзкі пабег быў здзейснены ў 2009 годзе ў Жодзіна Сяргеем Багдашавым. Спецыяліст у згоне дарагіх аўтамабіляў і крадзяжоў накінуўся на канваіра, выхапіў у яго табельную зброю і ўцёк. Тут жа быў абвешчаны план «Сірэна», аднак безвынікова. Уцёк Багдашава стаў сапраўдным ПП. Знайсці яго было справай гонару міліцыянтаў, таму ў кожным аддзяленні доўгія гады вісеў фотаздымак злачынцы. Затрымаць мужчыну змаглі праз пяць гадоў у Расеі, дзе ён паспеў абкрасці некалькі элітных катэджаў. Хутка ён паўстане перад судом.