Die Zeit: Пуцін прайграў

Прэзідэнт Расеі ўжо прайграў вайну.

"Калі Украіна – гэта "вялікая гульня", пераможца ў якой атрымлівае апошнюю і самую вялікую ва Усходняй Еўропе тэрыторыю пасля развалу Савецкага Саюза, то выйграў цяпер яе не Уладзімір Пуцін", - піша Ёхен Бітнер на старонках нямецкай газеты Die Zeit.

Так, ён атрымаў "Крым і ўсход Украіны". Але тут, як піша журналіст, дарэчы пытанне: наколькі гэтыя набыцці сапраўды патрэбныя. Абодва гэтыя рэгіёны, на думку Бітнера, наадварот, "прыносяць Крамлю больш клопату, чым выгады, прычым як у эканамічным, так і ў палітычным плане". "Калі б Пуцін усведамляў гэтай вясной, якую шкоду нанясуць Расеі ўведзеныя за анэксію Крыма санкцыі, ён бы не гэтак самаўпэўнена пасылаў туды зялёных чалавечкаў і праводзіў там рэферэндум, ды і не факт, што зрабіў бы гэта наогул", - піша аўтар.

Яшчэ адно пытанне: што ж Пуцін будзе рабіць з Усходняй Украінай, калі не ўлічваць таго, што яна выгадная ў якасці "сухапутнага моста" ў Крым? Данецкі вугальны і прамысловы басейн ўжо даволі працяглы час мае патрэбу ў санацыі, а мяркуючы па паводзінах камандзіраў сепаратыстаў, рэгіён паступова ператвараецца ў мафіёзную дзяржаву. "Якая будучыня чакае гэты рэгіён? Хто будзе інвеставаць туды сродкі? - Працягвае журналіст. - Так, цалкам магчыма, што гэта будуць расейскія абаронныя прадпрыемствы". Але нават пры гэтай умове, упэўнены Бітнер, "Пуціну прыйдзецца ісці на істотныя фінансавыя ўліванні для падтрымання гэтага рэгіёну".

Захад жа, у сваю чаргу, атрымаў наступнае: па-першае, Заходняя Украіна як ніколі раней будуе сваю будучыню разам з ЕЗ. Па-другое, выбары ў Вярхоўную Раду Украіны паказалі, што амаль дзве траціны ўкраінцаў, не ўлічваючы тых, хто не змог ці не захацеў прагаласаваць на Усходзе, аддалі свае галасы за празаходнія партыі і канчатковы разрыў з постсавецкай палітычнай культурай. Гэтае сяброўства таксама можа абысціся для Еўразвяза даволі дорага, паколькі ўкраінская эканоміка практычна не канкурэнтаздольная, самой краіне яшчэ вельмі далёка да дэмакратычнай мадэлі развіцці і ўсюды пануе карупцыя. Аднак, у адрозненне ад Пуціна, Еўропа атрымала партнёра, які хоча ісці не назад, а наперад і выступае за перамены, а не скуголіць па страчанай велічы.

Таму Пуцін ужо прайграў, канстатуе аўтар. Пытанне палягае толькі ў велічыні яго пройгрышу.

Пераклад на беларускую: Inopressa.ru