Нямцоў распавёў, калі ў Расеі магчымы Майдан

Пуцін многае зрабіў для таго, каб у Расеі быў Майдан.

Пры гэтым расейскі апазіцыйны палітык Барыс Нямцоў лічыць, што ў РФ пакуль немагчымая праеўрапейская рэвалюцыя, падобная ўкраінскаму Майдану.

Пра гэта ён распавёў выданню "Медуза".

На пытанне аб магчымасці Майдана Нямцоў адказаў: "Я думаю, не. Украіна значна больш еўрапейская краіна, чым Расея. Нават тыя, хто былі прыхільнікамі Януковіча, былі за Еўропу".

"Наогул, Майдан - рукатворная справа ўлады. Гэта не рэвалюцыянеры і актывісты, якія сабраліся і вырашылі нешта ўладкаваць. Улада [сама] заўсёды правакуе Майдан. Ва Украіне правакацыя складалася ў падмане ўкраінскага народа, калі Януковіч сказаў, што будзе падпісваць дакументы аб еўраінтэграцыі, а потым адмовіўся. Людзі не любяць, калі іх моцна падманваюць. Паўстанне адбываецца тады, калі людзей улады давялі да ручкі. у Расеі так было і ў 1917-м, і ў 1991-м, і ў 2011-м на Сахарава і Балотнай", - адзначыў апазіцыянер.

На думку Нямцова, Пуцін у прынцыпе шмат зрабіў для таго, каб у Расеі быў Майдан.

"Ён незмяняльны прэзідэнт, ён цынічны і хлуслівы. Але паколькі агулам узровень жыцця грамадзян зніжаецца вельмі павольна, то крытычнай масы для паўстання няма. Але яе з'яўленне магчымае, калі будзе рэзкае зніжэнне ўзроўню жыцця і абвастрэнне міжнацыянальных канфліктаў на Паўночным Каўказе", - сказаў ён.