Генпракуратура прапанавала свой варыянт барацьбы з «дармаедамі»

У Генпракуратуры прапануюць больш актыўна выяўляць тых, хто нелегальна працуе за мяжой і купляе нерухомасць.

Генеральная пракуратура мяркуе, што трэба неадкладна актывізаваць працу дзяржорганаў і арганізацый у пераадоленні сацыяльнага ўтрыманства. У сувязі з гэтым ведамства накіравала адпаведныя лісты ў МУС, у Міністэрства падаткаў і збораў, Мінпрацы і сацабароны, Мінжылкамгас, аблвыканкамы і Менскі гарвыканкам. Пра гэта БелТА паведамілі ў Генеральнай пракуратуры Беларусі.

«Значную частку тых, хто ўхіляецца ад фінансавання дзяржаўных расходаў, складаюць грамадзяне, вызваленыя з устаноў крымінальна-выканаўчай сістэмы, якія вядуць асацыяльны лад жыцця, а таксама злоўжываюць алкагольнымі напоямі», - мяркуюць у пракуратуры.

З гэтай прычыны МУС і Мінпрацы прапанавана прыняць меры ў няўхільным выкананні патрабаванняў арт.19 закона «Аб асновах дзейнасці ў прафілактыцы правапарушэнняў» - забяспечыць індывідуальны падыход пры браніраванні працоўных месцаў і далейшым працаўладкаванні асоб, якія вызваліліся з месцаў пазбаўлення волі.

У наглядным ведамстве таксама адзначаюць, што патэнцыял органаў кіравання і арганізацый што да ўключэння грамадзян у грамадска карысныя працы часам выкарыстоўваецца фармальна і неэфектыўна, без прымянення мер індывідуальнага ўздзеяння. У тым ліку не заўсёды належным чынам прымяняюцца формы і метады працоўнай рэадаптацыі для былых зняволеных. «Нярэдка папраўчыя ўстановы абмяжоўваліся накіраваннем у органы па працы, занятасцi i сацыяльнай абароне фармальных апавяшчэнняў аб вызваленні асоб без указання прафесіі і патрэбнасці ў працаўладкаванні. Сацыяльныя службы ў сваю чаргу не праводзілі бранявання працоўных месцаў для гэтай катэгорыі асоб у адпаведнасці з заканадаўствам», - канстатуюць у пракуратуры.

Акрамя таго, у краіне застаецца адносна высокай колькасць грамадзян, якія стаяць на медыцынскім уліку ў сувязі са злоўжываннем алкаголем. «Многія з іх вядуць асацыяльны лад жыцця і знаходзяцца на прафілактычным уліку ў органах унутраных спраў. Аднак меры ўздзеяння з боку суб'ектаў прафілактыкі правапарушэнняў, перш за ўсё органаў унутраных спраў, аховы здароўя, па працы, занятасцi i сацыяльнай абароне, не заўсёды арыентаваныя на ўцягванне правапарушальнікаў у працоўную дзейнасць», - адзначаюць у ведамстве.

У Генеральнай пракуратуры нагадалі, што ведамства раней прапаноўвала разгледзець пытанне аб абмежаванні часу продажу алкагольных напояў у рознічнага сетцы ў адпаведнасці з законам «Аб дзяржаўным рэгуляванні вытворчасці і абароту алкагольнай, нехарчовай спіртаўтрымліваючай прадукцыі і нехарчовага этылавага спірту». Аднак да гэтага часу ў Берасцейскай, Гомельскай, Менскай і Магілёўскай абласцях дастатковых мер у гэтым кірунку не прынята. Таму ў сваіх лістах пракуратура прапанавала аблвыканкамам сумесна з органамі ўнутраных спраў паўторна падумаць пра абмежаванні на продаж алкагольнай прадукцыі, асабліва ў рэгіёнах, дзе адзначаецца значная колькасць правапарушэнняў.

«Аднымі з негатыўных наступстваў сацыяльнага ўтрыманства і п'янства з'яўляюцца факты ігнаравання грамадзянамі абавязку ўнясення платы за камунальныя паслугі. Паводле стану на 1 кастрычніка 2014 года ў рэспубліцы налічваецца больш за 176 тысяч даўжнікоў па камунальных плацяжах, сума запазычанасці перавысіла Br350 млрд, з якіх Br40 млрд складае пратэрмінаваная запазычанасць», - паведамляюць у Генпракуратуры. Пры гэтым механізм спагнання запазычанасці, прадугледжаны арт.155 Жыллёвага кодэкса, вельмі рэдка выкарыстоўваецца мясцовымі выканаўчымі і распарадчымі органамі. У гэтым годзе ў суды пададзена толькі 8 пазоваў аб прымусе даўжніка да адчужэння жылога памяшкання ў сувязі з ухіленнем ад выплаты запазычанасці за жыллёва-камунальныя паслугі. У сувязі з гэтым Мінжылкамгасу, мясцовым выканаўчым і распарадчым органам прапануецца сістэмна працаваць у спагнанні запазычанасці па аплаце камунальных паслуг і растлумачэнню наступстваў ухілення ад выплаты за гэтыя паслугі.

Акрамя гэтага, у пракуратуры мяркуюць, што падатковыя органы павінны нашмат больш актыўна выяўляць і спыняць факты ўхілення ад выплаты падаткаў з боку тых, хто вядзе незаконную прадпрымальніцкую дзейнасць. «Усе выпадкі набыцця непрацуючымі грамадзянамі дарагой рухомай і нерухомай маёмасці, а таксама здзяйснення імі ўгод у буйным памеры павінны стаць прадметам дбайнай праверкі законнасці крыніц даходаў з ужываннем падатковых санкцый», - мяркуюць у наглядным ведамстве. Міністэрству падаткаў і збораў, як мяркуюць у пракуратуры, неабходна, больш актыўна выяўляць факты незаконнага прадпрымальніцтва і ўтойвання даходаў ад падаткаабкладання з боку не толькі нідзе афіцыйна не працуючых, але і тых, хто нелегальна працуе за межамі Беларусі.

«Выкананне названых у лісце даручэнняў узятае на кантроль Генеральнай пракуратурай», - падкрэсліваюць у ведамстве.