Навукоўцы прапанавалі замяніць кандыцыянеры люстэркамі

Люстэркі будуць перанакіроўваць лішкі цяпла ў глыбіні космасу.

Амерыканскія інжынеры прапанавалі замяніць кандыцыянеры на люстэркі, якія будуць перанакіроўваць лішкі цяпла ў глыбіні космасу. Аб новай тэхналогіі паведамляецца ў часопісе Nature і прэс-рэлізе Стэнфардскага універсітэта, піша Lenta.ru.

Праведзеныя ў Каліфорніі эксперыменты паказалі, што пафарбаваны ў чорны колер дах у сонечны дзень становіцца на 60 градусаў Цэльсія гарачэй, чым навакольнае паветра, паверхня з неафарбаванага алюмінія - на 40 градусаў, а пакрытая люстэркамі - на 5 градусаў халадней.

Паверхня таўшчынёй у два мікроны складаецца з некалькіх тонкіх слаёў: срэбра (святлоадбівальны пласт) і «цераспалосіцы» двухвокісу крэмнію і вокісу гафнія. Апошнія два матэрыялы і ператвараюць люстэрка ў тэрмавыпраменьвальнік: калі двухвокіс крэмнія награваецца, ён пачынае выпраменьваць цяпло ў выглядзе інфрачырвонага святла з даўжынёй хвалі парадку дзесяці мікрон. Такое выпраменьванне атмасфера Зямлі практычна не паглынае, і ў выніку цяпло ідзе наўпрост у космас.

«Халодная цемра Сусвету можа быць выкарыстаная ў якасці аднаўляльнага тэрмадынамічнага рэсурсу нават у самы гарачы час дня», - пішуць навукоўцы.

Люстэрка адлюстроўвае да 97 адсоткаў святла, якое трапляе на яго. Ягоная астуджальная здольнасць дасягае 40 ват на квадратны метр. Паводле разлікаў інжынераў, устаноўка такіх канструкцый на дах трохпавярховага будынка дазволіць зэканоміць 100 мегават-гадзін электраэнергіі. Больш за тое, люстэркі дапамогуць наогул адмовіцца ад выкарыстання кандыцыянераў у многіх будынках. Гэтыя прылады спажываюць да 15 працэнтаў усёй электраэнергіі, якая забяспечвае функцыянаванне будынкаў ЗША, нагадваюць навукоўцы.

Малюнак: Stanford University