На гэтым тыдні будзе не па сезоне цёплае надвор'е

Умовы надвор'я будуць вызначаць цёплыя паветраныя масы з паўднёвага захаду Еўропы.

Пра гэта паведаміў начальнік службы гідраметэаралагічных прагнозаў Рэспубліканскага гідраметэацэнтра Дзмітрый Рабаў падчас відэабрыфінгу 3 лістапада, піша БелаПАН.

«Умовы надвор'я будуць вызначаць цёплыя паветраныя масы з паўднёвага захаду Еўропы. Да пятніцы прагназуецца пераважна без ападкаў, толькі 6 лістапада (чацвер) удзень месцамі па паўднёвым захадзе кароткачасовыя дажджы. Уначы і раніцай месцамі па краіне туман. Тэмпература паветра на працягу тыдня чакаецца на 3-5 градусаў вышэйшай за норму, а па паўднёвым захадзе на 6-9», - адзначыў сіноптык.

У аўторак мінімальная тэмпература ноччу мінус 3 - плюс 4°С, па паўднёвым усходзе да плюс 6°С, максімальная ўдзень плюс 5-11°С, у паўднёва-заходніх раёнах да плюс 14°С.

У сераду яшчэ цяплей: уночы 0 - плюс 6°С, па паўднёвым усходзе мінус 1-5°С, максімальная ўдзень плюс 6-13°С, па паўднёвым захадзе плюс 14-16°С.

У чацвер мінімальная тэмпература ўначы плюс 1-8°С, па паўднёвым усходзе месцамі 0 - мінус 3°С, максімальная ўдзень плюс 8-14°С, па паўднёвым захадзе да плюс 16°С.

«У пятніцу надвор'е сапсуецца, і віной таму атмасферны фронт, які будзе перамяшчацца з Польшчы праз Беларусь і прынясе на большую частку тэрыторыі кароткачасовыя дажджы. Але будзе па-ранейшаму цёпла», - адзначыў Рабаў. Тэмпература паветра мінімальная ўночы плюс 2-9°С, максімальная ўдзень плюс 6-13°С, па паўднёвым усходзе да плюс 16°С.

Паводле слоў Рабава, «у суботу і нядзелю з адыходам атмасфернага фронту дажджы на большай частцы спыняцца і пройдуць толькі месцамі, слупкі тэрмометраў пакажуць наступныя значэнні: уночыу плюс 1-8°С, пры праясненнях 0 - мінус 3°С, удзень плюс 5- 11°С, па поўдні плюс 12-14°С».

«У цэлым лістапад у гэтым годзе ў большай сваёй частцы парадуе нас цяплом: сярэдняя месячная тэмпература паветра ў лістападзе 2014 чакаецца на 1ºС вышэй за кліматычную норму, па паўднёвым усходзе рэспублікі - каля яе (кліматычная норма мінус 1 - плюс 3 ° С). Месячная колькасць ападкаў прагназуецца ў межах сярэдніх шматгадовых значэнняў, месцамі па паўднёвым усходзе рэспублікі - менш за кліматычную норму (кліматычная норма 40-63 мм) », - паведаміў Рабаў.

Фота: AP / Сяргей Грыц