Сушко: Масква «выбарамі» ў Данбасе дала сігнал, што гэта будзе новае Прыднястроўе

Застаецца адкрытым пытанне аб яго межах.

Пра гэта сказаў у каментары "ГОРДОН" дырэктар украінскага Інстытута еўраатлантычнага супрацоўніцтва Аляксандр Сушко.

"Да гэтага мы бачылі нейкіх людзей, якія з'яўляліся, прыходзілі, сыходзілі, захоплівалі будынкі, называлі сябе галоўнакамандуючымі. Потым іх неяк дзіўна ў адну ноч здымалі, замянялі іншымі людзьмі. І ўсё гэта не мела ніякай легітымнасці, акрамя легітымнасці вінтоўкі. Гэта значыць, хто са зброяй - той ўлада", - сказаў Сушко.

"За гэты час Расея больш-менш вызначылася з фігурамі, якія ў гэтых абставінах найбольш аптымальна з пункту гледжання Расеі рэпрэзентуюць тую палітычную праграму, якая ёй выгадная. Паколькі такія фігуры Крамлём вызначаныя, можна паспрабаваць іх легалізаваць з дапамогай падабенства выбараў з тым, каб даць сігнал, па-першае, пра тое, што Масква больш-менш вызначылася з тым, хто прадстаўляе іх на Данбасе, па-другое, што Масква вызначылася з тым, што яна гатовая ісці на кансервацыю гэтай сітуацыі. Праўда, ёсць яшчэ пытанне межаў, таму што я не думаю, што гэта ўсё канчаткова. Прынамсі, даецца сігнал, што гэта будзе новае Прыднястроўе і новая Абхазія", - лічыць эксперт.

На думку Сушко, ужо было вельмі шмат прагнозаў, якія не спраўджваліся. "Я спадзяюся, што я не памылюся, што не будзе маштабнага наступлення ў бліжэйшыя дні, аднак, гэта не азначае, што яго не будзе наогул. Я думаю, што яны не пойдуць да тактыкі франтальнага наступу. Яны зараз больш зацікаўленыя ў разгойдванні сітуацыі, у арганізацыі правакацый і месцаў дэстабілізацыі на падкантрольнай Украіне тэрыторыі. але не шляхам франтальнага наступу. Гэта могуць быць нейкія выступы, пранікненне ўзброеных людзей у іншыя гарады. Перш за ўсё, гаворка ідзе пра Марыўпаль, але не толькі пра Марыўпаль", - падсумаваў Сушко .