Разводаў у Беларусі стала менш: цяпер распадаецца 38% шлюбаў

Гэта менш на 10%, чым у 2012 годзе, і на 20%, чым у 2001-м.

Цяпер на 10 беларускіх вяселляў прыпадае 4 разводы, піша "Штодзённік".

Белстат паведамляе, што паводле стану на студзень-верасень 2014 года ў краіне зарэгістравана 65 тысяч шлюбаў. Таксама за гэты перыяд зарэгістравана 25 тысяч разводаў, гэта 38% ад заключаных шлюбаў. Што цікава, за аналагічны перыяд мінулага года ўзровень разводаў у параўнанні з узроўнем заключэння шлюбаў складаў усё тыя ж 38%: тады на 68 тысяч шлюбаў прыйшлося 26 тысяч разводаў.

Але ў апошнія гады сямейная сітуацыя значна палепшылася: за аналагічны перыяд 2012 колькасць разводаў на ўзроўні заключэння шлюбаў складала 51%: на 59 тысяч шлюбаў прыйшлося 30 тысяч разводаў.

Самая вялікая колькасць разводаў за апошнія 15 гадоў зафіксаваная ў 2001 годзе: тады колькасць разводаў на ўзроўні колькасці заключаных шлюбаў склала амаль 60%.