Для барацьбы з заторамі ў Гомелі будуць выкарыстоўваць ваенную тэхніку

У Гомельскай вобласці плануецца выкарыстоўваць баявыя вайсковыя цягачы.

На галоўных аўтамагістралях Гомельскай вобласці для недапушчэння затораў транспарту ў выпадку моцных снежных заносаў гэтай зімой плануецца выкарыстоўваць ваенную тэхніку. Пра гэта БелТА паведаміў прэс-сакратар абласнога ўпраўлення МНС Руслан Габрылёў, каментуючы вынікі нарады ў аблвыканкаме, на якой разглядалася пытанне гатоўнасці камунальных і дарожных службаў да працы ва ўмовах неспрыяльных умоў надвор'я.

У прыватнасці, гаворка ідзе пра тое, каб пры неабходнасці задзейнічаць так званыя баявыя вайсковыя цягачы. Падобная машына, напрыклад, маецца на Гомельскім інжынерным інстытуце МНС. Не выключана, што для гэтых мэт за сродкі мясцовага бюджэту будзе набыты яшчэ адзін магутны цягач на гусенічным хаду. "Вельмі складана, а часам амаль немагчыма, выцягнуць вялікагрузны аўтамабіль, які з'ехаў у кювет, выкарыстоўваючы звычайныя грузапад'ёмныя сродкі. Асабліва тады, калі фура яшчэ праязджае некалькі дзясяткаў метраў па снежнай цаліне. Вось у такіх выпадках дапамога ваенных машын вельмі дарэчная", - сказаў Руслан Габрылёў.

Паводле ягоных слоў, на нарадзе было адзначана, што ў цэлым спецыялізаваныя прадпрыемствы вобласці забяспечаныя неабходнай снегаўборачнай тэхнікай, створаны запас паліва і пясчана-саляных сумесяў. Адпрацаваная сістэма прыцягнення да расчысткі снегу тэхнікі прадпрыемстваў і арганізацый. "Разам з тым пастаўленая задача больш дэталёва прапрацаваць парадак дзеянняў усіх службаў ва ўмовах, якія могуць быць аналагічнымі тым, што склаліся зімой 2013 года, калі на тэрыторыі рэспублікі бушаваў "Хавер", - удакладніў прэс-сакратар абласнога ўпраўлення МНС.