Амерыканскі генерал: Вайсковы кантынгент ЗША ў Еўропе можа быць павялічаны

ЗША могуць павялічыць свой вайсковы кантынгент у Еўропе з мэтай забеспячэння абароны сяброў NATO ад расейскай агрэсіі.

Пра гэта заявіў у сераду, 5 лістапада, у Нью-Ёрку кіраўнік Аб'яднанага камітэта начальнікаў штабоў ЗША генерал Марцін Дэмпсі, паведамляе «Укринформ».

«Наша асноўная адказнасць, вядома, заключаецца ў нашай прыхільнасці статута NATO, у прыватнасці, артыкулы 5, які кажа, што напад на аднаго з'яўляецца нападам на ўсіх», - сказаў генерал.

У той жа час, адзначыў ён, складанасць сітуацыі заключаецца ў расейскай агрэсіі супраць Грузіі, Малдовы і Украіны - дзяржаў, размешчаных паміж хаўруснікамі ў NATO і Расеяй. Для дапамогі ў развязванні гэтага пытання амерыканскія вайскоўцы, на думку Дэмпсі, павінны ўзмацніць сваю прысутнасць у Еўропе. «Нам, напэўна, трэба зрабіць некаторыя рэчы на кожным кірунку - у паветры, на моры і на зямлі. Гэта, я думаю, будзе патрабаваць ад нас накіраваць сілы назад у Еўропу, якія мы адвялі», - адзначыў генерал.

Пры гэтым ён адзначыў, што не чакае значнага павелічэння амерыканскіх сіл у рэгіёне, але дадаў, што «яны будуць дастаткова істотнымі, каб дазволіць нам стрымаць расейскую агрэсію супраць нашых хаўруснікаў у NATO».

Са слоў Дэмпсі, Расея стварае нестабільную сітуацыю, разводзячы агонь нацыяналізму. «Як толькі вы запальваеце гэты агонь, ён становіцца некіравальным. Таму я хвалююся за Еўропу», - адзначыў прадстаўнік Пентагона.

Нагадаем, пасля анэксіі Крыма Расеяй вайскоўцы ЗША пачалі весці падрыхтоўчую працу для перадыслакацыі сіл у Еўропу з мэтай падтрымкі ўсходнееўрапейскіх хаўруснікаў Злучаных Штатаў у NATO. «Вайскоўцы ЗША праводзяць лагістычную працу, неабходную для перадыслакацыі сіл (у Еўропе - рэд.), у выпадку ўзнікнення такой неабходнасці», - адзначаў тады генерал Марцін Дэмпсі.

Першапачаткова ЗША хацелі павялічыць колькасць сваіх вайскоўцаў на авіябазе «Міхаіл Кагэлнічану», размешчанай на ўсходзе Румыніі. Са слоў прэзідэнта Румыніі Траяна Бэсеску, да 1000 вайскоўцаў, якія ўжо знаходзяцца на гэтай базе, павінны былі далучыцца яшчэ 600 чалавек. Таксама Вашынгтон прасіў свайго саюзніка ў NATO аб размяшчэнні на авіябазе дадатковых адзінак авіятэхнікі для выканання «асаблівых місій».