Лінкявічус: Каштоўнасці больш прыярытэтныя за стратэгічнае партнёрства c Расеяй

Міністр замежных спраў Літвы Лінас Лінкявічус у каментары, надрукаваным у The Guardian, піша, што расейскае кіраўніцтва «дамагаецца пацверджання сваёй агрэсіўнай і рэвізіянісцкай замежнай палітыкі».

Міністр папярэдзіў, што такія пакты могуць паўтарыцца, калі Захад не будзе прыкладаць намаганні, каб спыніць гэтаму шлях і будзе патураць Маскве.

«Прыйшоў час паставіць каштоўнасці вышэй за стратэгічнае партнёрства ў нашых стасунках з Расеяй. Надышоў час цвёрда адхіліць хлусню , якую расейскае кіраўніцтва выдае за «альтэрнатыўнае меркаванне», - заклікаў Лінкявічус, паведамляе Delfi.lt.

«Цвёрда абараняючы нашы каштоўнасці, можна заахвоціць Расею да пераасэнсавання яе амбіцый, калі мы будзем мякка рэагаваць, то штурханем яе на самыя жорсткія дзеянні», - сказаў міністр.

На гэтым тыдні на сустрэчы з гісторыкамі Пуцін апраўдаў пакт Молатава-Рыбентропа, сказаўшы, што «такімі тады былі метады замежнай палітыкі».

«Савецкі Саюз падпісаў дамову аб ненападзе з Нямеччынай. Кажуць: ах, як кепска. А што ж тут дрэннага, калі Савецкі Саюз не хацеў ваяваць? Чаго ж тут дрэннага?» - Сказаў Пуцін.

Са слоў дацэнта ўніверсітэта ім. Вітаўтаса Вялікага Рыціса Булоты, мэта кіраўніка Расеі - прымяншэнне падзелу тэрыторый, праведзенага СССР і нацысцкай Германіяй, аднак цалкам падмяніць гісторыю ён не можа, паколькі сам СССР у 1989 годзе асудзіў сакрэтныя пратаколы, якімі была падзеленая Усходняя Еўропа.

«Я думаю, што пуцінская рыторыка, звязаная з пактам, у першую чаргу арыентаваная на сваю краіну, накіраваная на ўзмацненне крайняга расейскага нацыяналізму, які называюць «антыфашызмам», для гэтага трэба прынізіць значэнне сувязяў паміж Сталіным і Гітлерам», - сказаў BNS палітолаг.

«Як вядома, вельмі важная частка мабілізуючай рыторыкі пуцінскага рэжыму - перамога ў вайне над фашызмам, і дыскурс пра тое, што «ваявалі ўсе дзядулі». Таму ён і хоча наколькі можна змяніць трактоўку пакта Молатава-Рыбентропа. Яна выварочвае яго ў бок мірнага пагаднення і імкнецца прынізіць значэнне падзелу тэрыторый і яго наступстваў. Прама заявіць, што сакрэтных пратаколаў не было, Пуцін (прынамсі, цяпер) не можа, паколькі 24 снежня 1989 года З'езд народных дэпутатаў СССР асудзіў сакрэтныя пагадненні паміж СССР і Нямеччынай у 1939-1941 гг і афіцыйна прызнаў «сакрэтныя пратаколы юрыдычна неабгрунтаванымі і не сапраўднымі з моманту іх падпісання», тым самым, прызнаўшы, што далучэнне краін Балтыі да СССР было антыканстытуцыйным», - сказаў Булота.

У пагадненні з Літвой ад 1991 Расея прызнала, што ў 1940 годзе была праведзеная анэксія, якая парушыла суверэннасць Літвы.

Са слоў гісторыка Альгімантаса Каспаравічуса, Пуцін хоча, каб, калі кажуць пра галоўных прычынах Другой сусветнай вайны, больш увагі надавалі Мюнхенскаму пагадненню 1938 года, у якім Англія і Францыя ва ўгоду Гітлеру наважылі, што Нямеччыне павінны аддаць Судзеты.

«Паколькі паміж Усходам і Захадам ідзе відавочная інфармацыйная вайна, паміж Расеяй і Заходнім светам, у гэтым выпадку і Мюнхен, і пакт Молатава-Рыбентропа, выкарыстоўваюцца як інструменты прапагандысцкай вайны», - сказаў навуковец Літоўскага інстытута гісторыі.

З ягоных слоў, «як на ўсходзе, так і на захадзе практычна без асаблівых дыскусій дамовіліся аб тым, што пастановы Мюнхенскай канферэнцыі і пакт Молатава-Рыбентропа фактычна дапаўнялі адзін аднаго і абумовілі пачатак Другой сусветнай вайны», і не пра адну з іх нельга забываць.

«Калі гаворка ідзе пра рэальную вайну, заўсёды лічаць. (...) Мне здаецца, што і цяпер у свеце вядуцца падобныя падлікі. Калі мець на ўвазе падзеі ва Украіне, ідуць падлікі: ва Украіне фактычна ідзе рэальная ўзброеная вайна, а што робіць Захад? Яны абвяшчаюць пра эканамічныя санкцыі. А эканамічныя санкцыі адэкватныя супраць зброі? Вядома, не», - сказаў Каспаравічус.

Латвійскія і эстонскія палітыкі таксама жорстка раскрытыкавалі словы Пуціна.

«Калі прэзідэнт Пуцін кажа, што пакт Молатава-Рыбентропа - нічога дрэннага, я кажу, што ў сучаснай Расеі ёсць вялізныя праблемы», - папярэдзіў міністр замежных спраў Латвіі Эдгар Рынкевіч.

«Спачатку Судзеты ў Крыме, цяпер гэта. Што далей?», - Прадставіў гістарычныя аналогіі прэзідэнт Эстоніі Тоомас Хендрык Ільвес.