У Баку адбыліся сутыкненні праз затопленую ліўнем дарогу (Відэа)

Блізу 30 чалавек затрыманыя.

На ўскраіне Баку раніцай у суботу, 8 лістапада, адбыліся сутыкненні паміж паліцэйскімі і мясцовымі жыхарамі, якія выйшлі на акцыю з патрабаваннем адпампаваць ваду з дарогі, затопленую падчас залевы. Пра гэта паведамляе «Радио Азадлыг».

Блізу тысячы жыхароў пасёлка Біна, размешчанага на паўночнай ускраіне Баку, выйшлі на акцыю, патрабуючы ад мясцовых уладаў ачысціць дарогу. Як паведаміў адзін з удзельнікаў акцыі Раман Мамедаў, людзі, што сабраліся, паводзілі сябе мірна, але паліцыя пачала груба разганяць іх. Сутыкненні сталі больш жорсткімі пасля таго, як паліцэйскія пачалі біць дубінкай пажылую жанчыну, якая ўпала ў лужыну.

Блізу 30 чалавек былі затрыманыя. У паліцыі апынуліся і тыя, хто здымаў тое, што адбываецца на камеры мабільных тэлефонаў.

Як адзначае агенцтва, пасля залевы грунтавая дарога даўжынёй 3-4 км апынулася цалкам затопленая вадой. Па ёй перасталі ездзіць аўтобусы, і жыхары вымушаныя кожны дзень хадзіць па калена ў бруднай вадзе.

Атрымаць каментар у аддзяленні паліцыі, куды былі дастаўленыя пратэстоўцы, журналістам агенцтва не ўдалося.

На кадрах відэасюжэту «Радио Азадлыг» з месца сутыкненняў бачныя сляды крыві на зямлі.

Між тым, у нядзелю днём у цэнтры прайшоў мітынг апазіцыйнага Нацыянальнага савета дэмакратычных сіл Азербайджана. Паводле ацэнкі карэспандэнта агенцтва «Интерфакс-Азербайджан», у акцыі бралі ўдзел блізу 1,5 тысячы чалавек. Яны патрабавалі вызваліць палітвязняў, спыніць ціск на СМІ, грамадзянскую супольнасць і няўрадавыя арганізацыі, а таксама рэфармаваць выбарчую сістэму і паскорыць працэс інтэграцыі ў Еўразвяз. Мітынг завяршыўся без здарэнняў.