Нацбанк пагражае санкцыямі 10 банкам

Нацбанк Беларусі пагражае санкцыямі 10 банкам, якія не выконваюць патрабаванні што да нарматыўнага капіталу.

Нацыянальны банк Беларусі выказвае занепакоенасць у сувязі з невыкананнем 10 банкамі рэспублікі патрабаванняў рэгулятара што да ўзроўню нарматыўнага капіталу і гатовы ўжыць да іх санкцыі, калі гэты нарматыў не будзе выкананы да 1 студзеня 2015 года, піша «Інтэрфакс».

«Колькасць банкаў, якія не выконваюць патрабаванні да капіталу, істотна не змяншаецца; у асобных банкаў не праглядаецца перспектыў іх выканання і да канца года. Звяртаем увагу, што на 1 кастрычніка велічыня нарматыўнага капіталу 10 банкаў складала менш за 25 млн еўра ў эквіваленце», - заявіў начальнік галоўнага ўпраўлення банкаўскага нагляду НББ Дзмітрый Лапко ў дакладзе на пашыраным пасяджэнні праўлення Нацбанка. Даклад публікуе часопіс НББ «Банкаўскі веснік».

Як раней паведамлялася, у адпаведнасці з усталяванымі Нацбанкам графікамі, з 1 студзеня 2014 года мінімальны памер нарматыўнага капіталу камбанкаў павінен складаць не менш за 15 млн еўра, з 1 студзеня 2015 года - не менш за 25 млн еўра.

Д.Лапко адзначыў, што адной з прычын невыканання патрабаванняў што да памеру нарматыўнага капіталу стала тое, што «не ўсе банкі дакладна разлічылі свае магчымасці, выплаціўшы дывідэнды замест дафармавання капіталу».

З ягоных слоў, да банкаў, якія не выконваюць патрабаванні да капіталу, ужытыя меры нагляднага рэагавання як папераджальнага, так і абмежавальнага характару.

«Разам з тым, запэўніванні многіх банкаў так і засталіся на паперы, рэальных мер не зроблена. Нацыянальны банк будзе няўхільна патрабаваць ад банкаў выканання нарматыву мінімальнага памеру нарматыўнага капіталу. У дачыненні да банкаў, якія не выконваюць патрабаванні да капіталу, будуць прыняты адэкватныя меры нагляднага рэагавання» , - падкрэсліў прадстаўнік НББ.

Д.Лапко таксама звярнуў увагу, што ў шэрагу банкаў нарматыўны капітал знаходзіцца «на памежным узроўні, які нязначна перавышае мінімальныя значэнні».

«Стрэс-тэсты, якія праводзяцца, сведчаць, што негатыўныя змены макраэканамічных умоў могуць выклікаць для гэтых банкаў праблемы ў выкананні нарматыву дастатковасці капіталу», - адзначыў ён.

Прадстаўнік НББ падкрэсліў, што банкі павінны ўлічваць гэтую акалічнасць і прадпрымаць дзейсныя меры ў нарошчванні запасу трываласці нарматыўнага капіталу.

Д.Лапко таксама адзначыў, што толькі 25% банкаў падтрымлівалі ў гэтым годзе паказчыкі падтрымкі ліквіднасці на мінімальна дапушчальным узроўні. З ягоных слоў, 21 банк не выконвае забяспячэння ліквіднасці. «Вынікі аналізу паказваюць і на іншыя праблемы - наяўнасць вялікіх адмоўных неадпаведнасцяў паміж паступленнем і адтокам грашовых сродкаў, высокі ўзровень канцэнтрацыі фандавання, а таксама структурную незбалансаванасць паміж актывамі і абавязацельствамі», - сказаў ён.

У Беларусі паводле стану на 1 снежня 2014 года дзейнічае 31 банк, які мае права на правядзенне банкаўскіх аперацый. З іх 27 банкаў з'яўляліся банкамі з удзелам замежнага капіталу, пры гэтым у 22 банках доля ўдзелу замежных інвестараў у статутным фондзе перавышала 50%.