Навагодні «сюрпрыз»: аб новых падатках ІП даведаюцца 1 студзеня
14- 10.12.2014, 8:54
- 30,031
Беларускім прадпрымальнікам у чарговы раз прыйдзецца даведацца аб падатковых зменах даслоўна напярэдадні іх уваходжання ў дзеянне.
Так пракаментаваў кіраўнік Асацыяцыі малога і сярэдняга прадпрымальніцтва, юрыст Сяргей Балыкін паведамленне 8 снежня ў «палаце прадстаўнікоў» міністра фінансаў Уладзіміра Амарына, піша БелаПАН.
«Як вынікае з заявы чыноўніка, законапраект аб папраўках у Падатковы кодэкс толькі рыхтуецца да разгляду ў парламенце. Такім чынам, ён будзе прыняты ў двух чытаннях палатай прадстаўнікоў, ухвалены саветам рэспублікі, падпісаны прэзідэнтам і апублікаваны ў лепшым выпадку ў канцы снежня, а ўвойдзе ў дзеянне з 1 студзеня», - адзначыў эксперт.
З ягоных слоў, атрымліваецца, што ў суб'ектаў гаспадарання не будзе дастаткова часу, для таго каб проста азнаёміцца з новымі правіламі гульні і прыняць для сябе нейкія пастановы.
«Бізнэсу ў чарговы раз давялося карыстацца праектамі Падатковага кодэкса, рознага роду неафіцыйнай інфармацыяй і проста чуткамі. Казаць пра нейкае сур'ёзнае планаванне бізнэсу ў такіх ўмовы проста не прыходзіцца», - канстатаваў кіраўнік АМІСП.
Ён адзначыў, што законапраект прадугледжвае дастаткова істотныя змены падатковага заканадаўства. Гэта і парадак вылічэння падаходнага падатку, ПДВ і падатку на прыбытак, стаўкі транспартнага збору «і мноства іншых дробных, але непрыемных навін».
Балыкін асабліва падкрэсліў, што дзяржава ў чарговы раз груба парушыла прэзідэнцкую дырэктыву №4 аб развіцці прадпрымальніцкай ініцыятывы. Яна прадугледжвае, што змены падатковага і гаспадарчага заканадаўства павінны быць апублікаваныя не пазней чым за тры месяцы да ўваходжання іх у дзеянне, гэта значыць у гэтым канкрэтным выпадку не пазней за 1 кастрычніка.
«Але бізнэс ужо рыхтуецца да навагодніх святаў, а найважнейшы для яго дакумент яшчэ нават не абмяркоўваўся ў парламенце», - адзначыў Балыкін.
Нагадаем, 8 снежня, міністр фінансаў Уладзімір Амарын, выступаючы на пашыраным пасяджэнні камісіі «палаты прадстаўнікоў» у бюджэце і фінансах, распавёў, што прадугледжанае павелічэнне ставак падатку на прыбытак для банкаў і страхавых арганізацый з 18 да 25% і павышэнне ставак падаходнага падатку з 12 да 13% з накіраваннем атрыманых дадатковых сродкаў на падтрымку сем'яў, якія выхоўваюць дзяцей.
Акрамя таго, запланавана ўвядзенне спецыяльнага збору за права экспарту сырой нафты, якая здабываецца ў Беларусі, а таксама надаванне права мясцовым саветам дэпутатаў павялічваць і памяншаць не больш чым у два з паловай разы стаўкі падатку на нерухомасць і зямельнага падатку асобным катэгорыям плацельшчыкаў замест дзеючага сёння нарматыву не больш чым у два разы.