Расейскі Іл-20 парушыў мяжу Эстоніі
21- 10.12.2014, 16:59
- 13,543
Улады Эстоніі заявілі, што яе паветраную прастору 9 снежня парушыў расейскі самалёт.
Паводле інфармацыі rus.DELFI.ee, самалёт-выведнік Іл-20 заляцеў на тэрыторыю краіны на 400 метраў і прабыў у яе паветранай прасторы менш за хвіліну.
Выданне адзначае, што ў судна адсутнічаў план палёту, яго транспондэр (перадатчык, які рэагуе ў адказ на прыняты сігнал) быў выключаны, аднак на радыёсувязь з эстонцамі ён выйшаў. Як удакладняе «Інтэрфакс», паветраная прастора была парушаная ў раёне выспы Осмусар а 17:05.
Парушэнне межаў паветранай прасторы зарэгістраваў цэнтр кіравання паветранымі аперацыямі ў Эмары. Нямецкія знішчальнікі, якія знаходзіліся ў паветры,і (паветраную прастору краін Балтыі ахоўваюць знішчальнікі саюзнікаў па NATO) правялі назіральны палёт і ідэнтыфікавалі борт. Пазней назіральны палёт здзейснілі і канадскія знішчальнікі CF-18, якія базуюцца ў Шаўляі.
У сувязі з інцыдэнтам Міністэрства замежных спраў Эстоніі выклікае расейскага пасла Юрыя Мерзлякова, каб уручыць яму ноту пратэсту.
Міністэрства абароны РФ інфармацыю пра ўварванне самалёта ў паветраную прастору Эстоніі зняпраўджвае. Паводле звестак ведамства, самалёт здзяйсняў планавы палёт па маршруце аэрадром Кубінцы (Маскоўская вобласць) - аэрадром Храброва (Калінінградская вобласць), піша Lenta.ru.
У канцы кастрычніка Эстонія таксама вінаваціла Расею ў парушэнні паветранай прасторы. Тады паведамлялася, што борт РФ паглыбіўся ў замежную паветраную прастору на 500 метраў. Мінабароны РФ абвінавачванні ў парушэнні межаў таксама зняпраўджвала.