Цана нафты маркі Brent упала ніжэй за $65 упершыню за пяць гадоў
14- 10.12.2014, 19:08
- 13,615
Цана барэля паўночнаморскай нафты Brent упершыню з верасня 2009 года апусцілася ніжэй за $65 за барэль.
Падзенне нафтавых каціровак зніжае курсы сыравінных валют, у тым ліку і рубля, піша РБК.
Падчас сённяшніх таргоў на біржы ICE Futures кошт ф'ючэрсаў Brent з пастаўкай у студзені 2015 апускаўся да $64,69 за барэль, што больш чым на 3,2% ніжэй за ўзровень закрыцця ўчорашніх таргоў і з'яўляецца самым нізкім паказчыкам з 29 верасня 2009 года.
Паводле стану на 18:30 мск кошт студзеньскага ф'ючэрса Brent складаў $64,86 за барэль, што на 2,97% ніжэй за ўзровень закрыцця папярэдніх таргоў. Адначасова кошт студзеньскіх ф'ючэрсаў нафты маркі WTI упаў сёння больш чым на 2%, апусціўшыся да $61,58 за барэль.
«Попыт не дапаможа скараціць лішак нафты - наадварот, паніжэнне прагнозаў азначае, што попыт на нафту картэлі ўпадзе і розніца паміж аб'ёмамі вытворчасці нафты ў АПЕК і попыт на яе нафту адпаведна вырасце. Пакуль краіны АПЕК будуць адмаўляцца ўносіць сваю лепту ў памяншэнне лішку нафты, вытворцам, якія не ўваходзяць у АПЕК, прыйдзецца ўзяць у асноўным на сябе задачу ў вяртанні балансу на рынак. Для гэтага патрэбныя нізкія цэны. Такім чынам, немагчыма прадказаць, дзе цана на нафту намацае «дно», - адзначаецца ў справаздачы аналітыкаў Commerzbank.
Яшчэ ў канцы лета ўдзельнікі сусветнага нафтагазавага рынку казалі аб цане на нафту ў $100 за бар. За тры восеньскія месяцы нафта патаннела амаль на 30%, і гэта не мяжа. Пра тое, як Расея будзе спраўляцца з няпростай эканамічнай сітуацыяй, яшчэ і ва ўмовах санкцый ЕЗ і ЗША, кажуць прадстаўнікі нафтавых кампаній і кіраўнікі профільных ведамстваў
Напярэдадні намеснік старшыні Знешэканомбанка і былы намеснік міністра эканамічнага развіцця РФ Андрэй Кляпач заявіў, што курс рубля да даляра стабілізуецца пасля таго, як цэны на нафту перавысяць узровень $70 за барэль.
Падчас сённяшніх таргоў на Маскоўскай біржы курс еўра ўстанавіў новы гістарычны рэкорд, падняўшыся да адзнакі 67,99 руб., курс даляра ўздымаўся да 54,701 руб.
У сярэдзіне лістапада эксперты Міжнароднага энергетычнага агенцтва (МЭА) паведамілі, што тэндэнцыя да зніжэння нафтавых коштаў яшчэ не вычарпала сябе. Паводле іх слоў, зніжэнне попыту на нафту з боку Кітая і рост нафтаздабычы ў ЗША прывядуць да таго, што ў пачатку 2015 года цэны на нафту ўпадуць ніжэй за цяперашнія мінімумы.
Адначасова прэзідэнт Расеі Уладзімір Пуцін заявіў, што ўлады дапускаюць магчымасць «катастрафічнага зніжэння коштаў на энерганосьбіты» і пралічваюць тое, як будзе развівацца ў гэтай сітуацыі эканоміка краіны.
27 лістапада ў інтэрв'ю аўстрыйскай газеце Die Presse кіраўнік кампаніі «Раснафта» Ігар Сечын прызнаў, што цана на нафту можа ўпасці да $60 за барэль. Ён дадаў, што зніжэнне нафтавых коштаў да такога ўзроўню задавальняе кампанію, але вымусіць яе адкласці некаторыя праекты.