Мадлен Олбрайт: Крызіс у рэгіёне выкліканы рэвізіянісцкай палітыкай Расеі

Экс-дзяржсакратар ЗША пра перспектывы развіцця на постсавецкай прасторы.

У сераду 10 снежня ў Вашынгтоне адбыўся другі амерыкана-казахстанскі форум «Супрацоўнічаць дзеля бяспечнай будучыні». Паралельна з мерапрыемствам прайшла сустрэча дзяржсакратара Джона Кэры з міністрам замежных спраў Казахстана Ерланам Ідрысавым.

Напярэдадні гэтай сустрэчы да ўдзельнікаў амерыкана-казахстанскага форуму звярнулася экс-дзяржсакратарка ЗША Мадлен Олбрайт, паведамляе «Голас Амерыкі».

Яна адзначыла, што на фоне інтэнсіўных працэсаў, з якімі маюць справу тыя, хто чыніць замежную палітыку ЗША, дыскусія пра будучыню амерыкана-казахстанскіх стасункаў і шляхоў развіцця, якія абярэ Казахстан, больш чым своечасовая.

Са слоў Олбрайт, за гады існавання незалежнага Казахстана стасункі дзвюх краін бесперапынна рухаліся па ўзыходзячай траекторыі.

«ЗША не гуляюць ні ў якія гульні ў Цэнтральнай Азіі, але праз геаграфічнае размяшчэнне краіны, у сілу яе ролі ў рэгіёне, наша цікавасць да Казахстана будзе пастаяннай», - адзначыла Олбрайт, падкрэсліўшы, што цяпер на шляху да супрацоўніцтва ўзнікаюць нязначныя перашкоды.

«Пераходная сітуацыя ў Афганістане, вывад амерыканскіх войскаў моцна хвалююць многіх у Цэнтральнай Азіі, - працягвала экс-дзяржсакратарка. - Акрамя гэтага нельга забываць пра крызіс у рэгіёне, выкліканым уварваннем Расеі ва Украіну. Гэты крызіс, безумоўна, справакаваны расейскай рэвізіянісцкай палітыкай».

Як падкрэсліла Мадлен Олбрайт, па меры абвастрэння сітуацыі Расея ўсё больш цісне на суседзяў.

«Зразумела, што ўвесь рэгіён занепакоены тым, які наступны крок зробіць Пуцін, - адзначыла Олбрайт. - Расейскі рэвізіянізм можа распаўсюдзіцца на любую цэнтральна-азіяцкую краіну, дзе ёсць рускамоўныя меншасці».

На гэтым фоне, падкрэслівае Олбрайт, ЗША павінны «ўмацоўваць стасункі» з Казахстанам.

«Мы пры гэтым не можам разглядаць нашы дзеянні ў рэгіёне як шахматную гульню, як гэта цягам пэўнага часу характарызавалі нашы палітолагі, - адзначыла экс-дзяржсакратарка. - Ніхто не можа прымусіць краіны ў рэгіёне прытрымлівацца тых ці іншых шляхоў. Свой кірунак яны павінны выбраць самі. Расея не можа прымусіць Казахстан ісці па якомусьці выгаднаму ёй кірунку. Мы ў сваю чаргу можам дапамагчы гэтай цэнтральна-азіяцкай краіне пабудаваць лепшую будучыню для самой сябе».

Экс-дзяржсакратарка таксама падкрэсліла, што для гарманічнага развіцця супрацоўніцтва ЗША і Казахстана неабходна, каб у краіне «палітычны прагрэс не адставаў ад эканамічнага развіцця».

«Мы не можам ігнараваць трывожныя тэндэнцыі, што маюць месца ў сферы правоў чалавека. Нельга ў гэтым кантэксце не згадаць пра справу апазіцыянера Уладзіміра Казлова. Гэта, безумоўна, крок у няправільным кірунку», - канстатавала Олбрайт.

Аддаючы належнае дынамічнаму развіццю Казахстана з моманту дасягнення незалежнасці, экс-дзяржсакратарка адзначыла, што эканамічнае развіццё не можа генеравацца «воднай рабізной аўтарытарнага рэжыму».

«Гісторыя вучыць нас таму, што кіраваная дэмакратыя на практыцы не працуе, - падкрэсліла Мадлен Олбрайт. - Менавіта таму мы гатовыя падтрымліваць Казахстан і ягоных суседзяў у развіцці дэмакратыі рэальнай. Я ўпэўнена, што ў гэтага партнёрства - велізарны патэнцыял».

Фота: EPA