Банкірка з Быхава абакрала пенсіянераў на мільярд рублёў

Супрацоўніца быхаўскага банка прысвоіла больш як Br1 млрд укладаў пажылых людзей.

Пра гэта гаворыцца на афіцыйным сайце Следчага камітэта.

Следствам высветлена, што 45-гадовая жыхарка Быхаўскага раёна, працуючы на пасадзе спецыяліста ў аказанні рознічных банкаўскіх паслуг аддзялення аднаго з банкаў горада і з'яўляючыся матэрыяльна адказнай асобай, займалася афармленнем і ўкладаннем ад імя банка дамоваў па ўкладах насельніцтва. Будучы дасведчанай з прычыны ўскладзеных на яе абавязкаў аб наяўнасці грашовых сродкаў на рахунках укладчыкаў, шляхам афармлення падробленых расходных касавых ордэраў прысвоіла размешчаныя ў банку грашовыя сродкі.

У перыяд з ліпеня 2005 года да траўня 2014 года зламысніца прысвоіла даручаныя ёй грашовыя сродкі ў асабліва буйным памеры на агульную суму больш як Br1 млрд. У працэсе расследавання былі выяўленыя шматлікія факты махлярства абвінавачванай. Не маючы намеру выконваць прынятыя на сябе абавязацельствы ў адкрыцці рахунку і залічэнні на яго грашовых сродкаў, злоўжываючы даверам укладчыкаў, абвінавачаная атрымлівала ад пацярпелых грошы і прысвойвала іх.

Ад супрацьпраўных дзеянняў абвінавачванай пацярпелі 16 укладчыкаў банкаў. У асноўным гэта людзі сталага веку. З паказанняў абвінавачванай вынікае, што выкрадзеныя грошы яна выдаткавала на асабістыя патрэбы.

Дзеянні падазраванай кваліфікаваныя паводле ч.4 211 (прысваенне маёмасці асобай, якой яна давераная, здзейсненае ў асабліва буйным памеры), ч.2, 4 арт.209 (махлярства, здзейсненае паўторна, у адмыслова буйным памеры), ч.3 арт.205 (крадзеж, учынены ў буйным памеры) Крымінальнага кодэкса Беларусі. Жанчына ўзятая пад варту.