Менчукі хочуць удзельнічаць у распрацоўцы Генплана горада

Карэкціроўка Генплана Менска патрабуе ўдзелу грамадскасці.

Да такой высновы прыйшлі ўдзельнікі круглага стала «Развіццё Менска: выклікі і перспектывы», які адбыўся ў Менску 28 лістапада. Сёння, 12 снежня, адпаведны зварот за подпісам 35 чалавек накіраваны ў Менгарвыканкам, паведамілі charter97.org у грамадзянскай ініцыятыве «Еўраперспектыва».

Менчукі просяць уключыць у склад камісіі, якая займаецца карэктурай Генплана Менска, прадстаўнікоў створанай грамадскай экспэртнай групы, а менавіта: лаўрэата Дзяржаўнай прэміі СССР у галіне архітэктуры Барыса Юрціна, архітэктара Уладзіміра Зіневіча і грамадскую актывістку Людмілу Гайкоўскую.

«У адпаведнасці з артыкулам 4 Закона Рэспублікі Беларусь ад 5 лiпеня 2004 года «Аб архітэктурнай, горадабудаўнічай і будаўнічай дзейнасці ў Рэспубліцы Беларусь» фізічныя асобы маюць права на спрыяльнае асяроддзе пражывання пры правядзенні архітэктурнай, горадабудаўнічай і будаўнічай дзейнасці, на дакладную, поўную і своечасовую інфармацыю аб стане асяроддзя пражывання і яе меркаваных зменах. Рэалізацыя права фізічных асоб на спрыяльнае асяроддзе пражывання прадугледжвае іх удзел у горадабудаўнічым планаванні развіцця населеных пунктаў і правядзенні архітэктурнай, горадабудаўнічай і будаўнічай дзейнасці», - гаворыцца ў звароце.

«У сапраўдны час Менгарвыканкам вядзе працу ў карэкціроўцы Генплана Менска. У СМІ паступае вельмі мала інфармацыі аб запланаваных горадабудаўнічых пастановах. Не валодаючы інфармацыяй, грамадскасць не мае магчымасці ацаніць і паўплываць на закладзеныя ў дакумент пастановы. А калі справа дойдзе да зацвярджэння падрыхтаванага адкарэкціраванага Генплана, знайсці кампраміс у спрэчным пытанні будзе больш складана. Таму да карэкціроўкі Генплана і павінна быць падключаная грамадскасць, каб спрэчныя пастановы былі агалошаныя, усебакова прааналізаваныя і знятыя яшчэ на этапе праектавання», - кажа каардынатар «Еўраперспектывы» Віктар Янчурэвіч.

Як паведамлялася раней, 28 лістапада пачала працу грамадская экспэртная група, мэтай работы якой з'яўляецца вывучэнне выклікаў, якія стаяць перад Менскам у сувязі з яго актыўным развіццём, аналіз дзеючага заканадаўства, а таксама распрацоўка змяненняў і дапаўненняў у нарматыўныя акты, якія рэгламентуюць развіццё гарадоў Беларусі. Дэкларацыю аб сумеснай дзейнасці ў гэтым кірунку падпісалі шэраг экспэртаў, сярод якіх лаўрэат Дзяржаўнай прэміі ў галіне архітэктуры Юрцін, старшыня савета ГА «Экадом», юрыст Фёдараў, чальцы камісіі «Архпросвет» Белавусаў і Кухарэнка, архітэктары Зубок і Зіневіч, прадстаўнікі ГІ «Еўраперспектыва» і Менскага гарадскога аб'яднання лакальных ініцыятыў. Грамадская група з'яўляецца адкрытай для далучэння зацікаўленых грамадзян.

Прыярытэтам работы грамадскай групы з'яўляецца павышэнне ролі грамадскага ўдзелу ў прыняцці горадабудаўнічых пастаноў, а таксама актуалізацыя прававога рэгулявання статусу гарадскіх зялёных зон, які гарантуе іх захаванасць. Першымі нарматыўнымі актамі, змены і дапаўненні ў якія будзе распрацоўваць грамадская група, будуць Рэгламенты Генеральнага плана Менска і Палажэнне аб парадку правядзення грамадскіх абмеркаванняў у галіне архітэктурнай, горадабудаўнічай і будаўнічай дзейнасці.