Раналда збіраецца аднавіць кар'еру футбаліста
3- 13.12.2014, 12:48
- 10,188
Вядомы бразільскі футбаліст Раналда можа аднавіць спартовую кар'еру.
Пра гэта паведамляе Estadao, піша Lenta.ru.
38-гадовы гулец, які завяршыў кар'еру ў 2011 годзе, можа працягнуць выступы ў камандзе Паўночнаамерыканскай футбольнай лігі (NASL) «Форт-Лодэрдэйл Страйкерс». Раналда з'яўляецца адным з уласнікаў клуба.
«Я буду актыўна ўдзельнічаць у фарміраванні каманды і мерапрыемствах, якія дапамогуць клубу развівацца і станавіцца мацнейшымі», - адзначыў бразілец, які выступаў на пазіцыі нападніка.
Раналда неаднаразова прызнаваўся найлепшым гульцом планеты паводле версій розных аўтарытэтных арганізацый і выданняў. Ён з'яўляецца двухразовым чэмпіёнам свету ў футболе і двойчы станавіўся лаўрэатам прэстыжнай узнагароды «Залаты мяч». За сваю кар'еру бразілец выступаў за такія каманды, як «Барселона», «Інтэр», «Рэал», «Мілан», ПСВ і нацыянальная каманда Бразіліі. Таксама ён атрымаў некалькі вядомых мянушак - «Зубасцік» і «Феномен».