Пад Данецкам на прадстаўнікоў АБСЕ напалі тэрарысты

Тэрарысты «Данецкай народнай рэспублікі» напалі на прадстаўнікоў маніторынгавай місіі АБСЕ ў Данбасе.

Інцыдэнт адбыўся каля Паўлопаля Данецкай вобласці. Пра гэта на брыфінгу паведаміў спікер Рады нацыянальнай бяспекі і абароны Андрэй Лысенка, піша Цензор.нет.

Паводле ягоных звестак, тэрарысты спынілі два аўтамабілі місіі на паўночна-ўсходнім напрамку ад Марыўпаля і пагражаючы зброяй прымусілі назіральнікаў выйсці з аўтамабіляў, пасля чаго іх абшукалі.

Андрэй Лысенка паведаміў, што падчас ператрусу тэрарысты ўдарылі аднаго з прадстаўнікоў прыкладам зброі. «Пасля гэтага ў суправаджэнні БТРа прымусілі місію праехаць у напрамку горада Акцябр», - сказаў ён.

Андрэй Лысенка падкрэсліў, што Украіна катэгарычна асуджае такое дзеянне баевікоў у адносінах да міжнародных назіральнікаў.