Арэнда жылля ў Менску: якія кошты будуць у 2015 годзе?

Студзень і люты - самыя камфортнымі месяцы для пошуку жылля ў сталіцы.

На працягу 2014 адбывалася паступовае зніжэнне сярэдняга кошту арэнды кватэр у Менску. Калі ў пачатку 2014 «траячкі» у сярэднім каштавалі $500, «двухпакаёўкі» - $472, а «аднапакаёўкі» - $375, то ў снежні кошты ўсталяваліся на ўзроўні, адпаведна, $475, $402 і $338. Чаго чакаць у наступным годзе? Намеснік дырэктара ў арэндзе жылля агенцтва нерухомасці «Твая сталіца» Наталля Радзеня ўпэўненая, што ніякіх перадумоў да павышэння коштаў няма і не прадбачыцца, піша onliner.by.

- Самае прыкметнае зніжэнне сярэдняй арэнднай стаўкі ў Мінску адбылося восенню, - распавяла яна. – Цягам двух апошніх месяцаў кошты зафіксаваліся, зніжэння не адчуваецца. Гэта лагічна, бо, як правіла, у канцы кожнага года рынак арэнды замірае ў прадчуванні змяненняў у новым годзе. Сваю ролю адыграла эканамічная сітуацыя ў Расеі - падзенне рубля. Нашы людзі насцярожыліся і чакаюць, як адаб'ецца тое, што адбываецца ў краіне-суседцы на эканоміцы Беларусі.

Цэны ў гэтым годзе нарэшце сталі адпавядаць якасці кватэр. Да прыкладу, за $350 можна зняць чыстую, акуратную кватэру з мэбляй і бытавой тэхнікай. Усё часцей за гэты кошт ёсць і кватэры з пральнай машынай. Якасць жылля палепшылася нават у эканом-сегменце. У мінулым годзе ўласнік мог выставіць цэннік $400 за забітую кватэру, пры гэтым пераступіць праз гару смецця са словамі «каму трэба, той змыецца». Сёння такія інцыдэнты больш не здараюцца. Нават кватэру савецкага ўзору здаюць прыбранай і акуратнай. Больш за тое, ужо сёння сустракаюцца «аднапакаёўкі» за $250. Яшчэ паўгода таму мы і не марылі сустрэць такую лічбу.

Што тычыцца запытаў і паводзін уласнікаў, яны, як і раней, рэгулярна патрабуюць заклад. Але папярэдняя аплата неабходная ўсё радзей і радзей. Гараджане сталі менш плацежаздольнымі і згаворлівым - згодны ўносіць плату максімум на месяц наперад.

2014 для рынку арэнды, са слоў спецыяліста, быў не тыпова спакойным. Не здарылася ўсплёску студэнцкага попыту. Немалую ролю адыграў ЧС у хакеі, які падарыў Менску шэраг студэнцкіх інтэрнатаў, і дэмаграфічная яма, якая назіралася з 1994 да 1996 года.

Зноў-такі дзякуючы чэмпіянату Менск атрымаў вялікую колькасць камфартабельных гаіэляў, што адбілася на рынку кароткатэрміновай арэнды. На думку Наталлі, сутачныя кватэры не могуць канкураваць з камфортам і якасцю гасцінічных нумароў, таму спад попыту і цэн на сутачныя кватэры немінучы.

- Прадказаць што-небудзь складана. У гэты момант няма ніякіх перадумоў да павелічэння кошту арэнды кватэр, - сказаў на заканчэнне спецыяліст. - Лагічным будзе, наадварот, некаторае зніжэнне ставак. Студзень і люты заўсёды з'яўляліся самымі камфортнымі месяцамі для пошуку жылля.