Мясніковіч: Эканамічная бяспека Беларусі пад пагрозай

Міхаіл Мясніковіч запатрабаваў тэрмінова актывізаваць экспарт за межы Мытнага саюза.

«За студзень-кастрычнік гэтага года па краінах Мытнага саюза мы «аселі» на $777 млн, у тым ліку па Расеі - на $ 739 млн, - адзначыў ён. - Мы недабіраем вельмі вялікія аб'ёмы экспарту ў Расейскую Федэрацыю, нягледзячы на тое што ў фізічным вылічэнні практычна па ўсіх пазіцыях пастаўляем больш прадукцыі».

Такое становішча спраў, з ягоных слоў, уяўляе сур'ёзную пагрозу эканамічнай бяспецы рэспубліцы, паведамляе БелТА. І хоць за кошт нарошчвання экспарту ў трэція краіны Беларусі ўдалося кампенсаваць $757 млн, гэтага, падкрэсліў Міхаіл Мясніковіч, недастаткова. «Неабходна прымаць самыя рашучыя дзеянні, каб актывізаваць экспарт у краіны па-за Мытнага саюза».

Як адзначыў у сувязі з гэтым міністр замежных спраў Уладзімір Макей, адным з кірункаў шматвектарнай палітыкі Беларусі з'яўляецца развіццё супрацоўніцтва з краінамі Паўднёвай Азіі, у прыватнасці з Бангладэш. Беларуска-бангладэшскі гандаль у 2013 годзе склаў $ 133,3 млн, у тым ліку беларускі экспарт дасягнуў $115,4 млн. Яго аснову складаюць калійныя ўгнаенні (99,4%). У студзені-верасні гэтага года двухбаковы тавараабарот склаў $63 млн, экспарт у Бангладэш - $43.120.000. Забяспечана дадатнае сальда ў суме $23,2 млн. «Бангладэш уяўляе для Беларусі цікавасць як рынак збыту калійных угнаенняў, прадукцыі машынабудавання, а таксама паслуг у галіне адукацыі, - адзначыў кіраўнік МЗС. Паводле вынікаў гэтага года Беларуская калійная кампанія плануе паставіць у Бангладэш блізу 212 тыс т хлорыстага калія пры прагнозе 200 тыс т».

Найважнейшым праектам, які знаходзіцца на кантролі ўрада і МЗС, з'яўляецца арганізацыя паставак у Бангладэш тэхнікі «Амкадор» і МАЗ з выкарыстаннем механізму падтрымкі экспарту. Таксама бакі працягваюць працаваць над арганізацыяй правядзення першага пасяджэння сумеснай беларуска-бангладэшскія камісіі ў гандлёвым і эканамічным супрацоўніцтве. Папярэдне мерапрыемства запланаванае на першы квартал 2015 года.

У цэлым жа, працягваючы тэму дыверсіфікацыі рынкаў збыту, Уладзімір Макей адзначыў: «Не толькі кіраўніцтва краіны, МЗС адказваюць за дыверсіфікацыю экспарту - гэта залежыць ад кожнага міністэрства, кожнага прадпрыемства. Без настойлівага імкнення кожнага ведамства мы не дасягнем пастаўленых мэтаў». Пры гэтым работа ў гэтым напрамку, падкрэсліў міністр, павінна весціся пастаянна, а не толькі ў выпадку ўзнікнення якой-небудзь крызіснай сітуацыі.