Залеўскі: Дзяржава ставіць журналістаў у нелегальнае становішча
1- 16.12.2014, 20:40
- 9,326
Услед за двума адміністрацыйнымі штрафамі незалежнаму журналісту Алесю Залеўскаму вынесенае пракурорскае папярэджанне.
Як паведамляе прэс-служба БАЖ, папярэджанне аб недапушчальнасці парушэння заканадаўства аб СМІ падпісанае намеснікам пракурора г. Менска Казімірам Кяжунам. Падставай для папярэджання стаў факт асвятлення журналістам разгляду справы аб высылцы з Беларусі вядомай праваабаронцы Алены Танкачовай.
Паводле інфармацыі, сабранай пракуратурай, у той дзень Алесь Залеўскі рабіў відэасюжэт ў інтарэсах тэлеканала «Белсат», чым парушыў беларускае заканадаўства.
Сам журналіст лічыць, што беларускія ўлады самі паставілі незалежных журналістаў у нелегальнае становішча.
- Шмат разоў тэлеканал "Белсат" спрабаваў атрымаць афіцыйную акрэдытацыю ў Беларусі, але Міністэрства замежных спраў штогод адмаўляе нам у гэтым. Мы вельмі хацелі б працаваць легальна, робім для гэтага ўсё магчымае. Але «мяч» у справе акрэдытацыі "Белсату" пастаянна на баку афіцыйнага Менска, а гэтыя папярэджанні і штрафы яшчэ больш падкрэсліваюць неабходнасць нас акрэдытаваць.
Характэрна, што толькі на мінулым тыдні штрафам у 6 мільёнаў рублёў скончылася другая ў ліку адміністрацыйная справа супраць журналіста. Папярэднюю падобную справу супраць Залеўскага заводзілі ў Карэлічах у траўні бягучага года. Яе вынікам стаў штраф у 4 500 000 рублёў.
Разам з тым ГА "Беларуская асацыяцыя журналістаў" і многія міжнародныя арганізацыі ўжо шмат гадоў заклікаюць беларускія ўлады адмовіцца ад дыскрымінацыйнага механізму акрэдытацыі.
У гэтым годзе асаблівую ўвагу гэтай справе надаваў і кіраўнік офіса АБСЕ ў пытаннях свабоды слова Дуня Міятавіч падчас афіцыйнага візіту ў Менск.
Фота: Барыс Гарэцкі