У Беларусі забароняць Дзеда Мароза?

«Палатачнікі» забаранілі ўдзельнікам масавых мерапрыемстваў насіць маскі і іншыя сродкі для цяжкасці высвятлення іх асобы.

«Дэпутаты» на паседжанні 17 снежня прынялі ў другім чытанні папраўкі ў некаторыя законы ў пытаннях забеспячэння грамадскай і памежнай бяспекі, паведамляе БелаПАН.

Як паведаміў намеснік старшыні парламенцкай камісіі ў нацыянальнай бяспецы Уладзімір Базанаў, прынамсі, папраўкі забараняюць падчас правядзення сходаў, мітынгаў, вулічных шэсцяў, дэманстрацый або пікетаванняў іх арганізатарам і ўдзельнікам хаваць твары, у тым ліку з выкарыстаннем масак або сродкаў для цяжкасці высвятлення іх асобы.

Акрамя таго, адзначыў Базанаў, законапраект удасканальвае прававое рэгуляванне паўнамоцтваў дзяржаўных органаў у галіне дзяржаўнай памежнай палітыкі, парадку ўезду (уваходу) у пункты пропуску, часовага знаходжання і перамяшчэння ў памежнай зоне і памежнай паласе, рэжыму ў пунктах пропуску, правядзення памежнага кантролю.

Са слоў «дэпутата», законапраект спрыяе развіццю заканадаўства ў галіне памежнай палітыкі, а таксама забеспячэнню памежнай і грамадскай бяспекі.

Цікава, што 25 снежня ў Менску пройдзе шэсце Дзядоў Марозаў, твары ўдзельнікаў якога будуць схаваныя бародамі. Напярэдадні Новага года традыцыйна праводзяцца і іншыя мерапрыемствы з удзелам гэтага казачнага персанажа. Калі прытрымлівацца новага закону, то яны павінны быць забароненыя.