«Інспектары-пярэваратні» займалася незаконным паляваннем

Абвінавачванне выстаўленае 11 асобам, у тым ліку тром супрацоўнікам інспекцыі аховы жывёльнага і расліннага свету.

Памятаеце мініяцюру Міхаіла Жванецкага з яго яшчэ савецкага рэпертуару? «Што ахоўваеш - то і маеш. Нічога не ахоўваеш - нічога не маеш. Хочаш лася ўзяць, ідзі ў таварыства аховы прыроды», - раіў сатырык.

Так, мабыць, і вырашылі паступіць некаторыя рэгіянальных кіраўнікоў Дзяржаўнай інспекцыі аховы жывёльнага і расліннага свету пры прэзідэнце і міліцыянты, якія далучыліся да іх, піша Naviny.by. Чыноўнікі ў пагонах і без забівалі ў чарнобыльскай зоне кабаноў, казуль і ласёў, але папаліся.

Незаконнае паляванне павярнулася для інспектараў нежартоўна: распачатая крымінальная справа, падазраваныя пад вартай.

Згодна з інфармацыяй КДБ, група асоб сістэматычна займалася незаконным паляваннем у зоне адсялення і адчужэння на тэрыторыі Веткаўскага раёна Гомельскай вобласці, дзе ўстаноўленая забарона на паляванне.

Браканьерская брыгада была сфарміраваная са службовых асоб інспекцыі аховы жывёльнага і расліннага свету, Беларускага таварыства паляўнічых і рыбаловаў, УУС Гомельскага аблвыканкама, а таксама грамадзян без пагонаў.

Намеснік начальніка Гомельскай міжраённай інспекцыі аховы жывёльнага і расліннага свету катаўся па чарнобыльскай зоне на аўтамабілі УАЗ з рэгістрацыйным нумарам «Сярога». Для затрымання парушальнікаў КДБ давялося ўжыць табельную зброю, адзін з браканьераў атрымаў агнястрэльнае раненне.

Акрамя забітых чатырох ласёў, у браканьераў знайшлі і канфіскавалі 4 карабіны, 8 адзінак паляўнічай гладкаствольнай зброі, адну пнеўматычную вінтоўку і больш за 300 патронаў да наразной зброі, а таксама металічныя вожыкі з арматуры, якія выкарыстоўваюць браканьеры супраць аўтатранспарту міліцыі, які пераследуе іх.

Шкоду, нанесеную прыродзе, ацанілі ў 540 млн. рублёў.

Абвінавачванне выстаўленае 11 асобам, у тым ліку тром супрацоўнікам інспекцыі аховы жывёльнага і расліннага свету, пяці супрацоўнікам УУС Гомельскай вобласці і службовай асобе спецлясгаса.

Кажуць, што ласяціну і фарш «інспектар-пярэварацень», ураджэнец Свяцілавічаў (Веткаўскі раён), прадаваў мясцовым жыхарам па 40-45 тысяч рублёў. Нядорага. Меў тут свой гешэфт і нейкі расеец, жыхар Чырвонай Гары.

Перш, чым КДБ выступіў з афіцыйнай справаздачай аб паспяхова праведзеным «паляванні», інспекцыя аховы жывёльнага і расліннага свету таксама сказала сваё слова, адхрысціўшыся ад «гомельскіх». Маўляў, даўно ўжо мы ведалі, што людзі яны не зусім надзейныя, і адэкватна рэагавалі.

«Раней кіраўніцтвам Дзяржаўнай інспекцыі адзначаліся недахопы ў кіраўніцкай дзейнасці Гомельскай абласной інспекцыі. За хібы ў працы ў кастрычніку 2014 начальнік абласной інспекцыі быў адхілены ад пасады і ў наступным звольнены», - праінфармавала інспекцыя, дадаўшы, што звольнены таксама намеснік начальніка абласной інспекцыі. Іншыя адказныя асобы паніжаныя на пасадзе.

Дарэчы, у кастрычніку за незаконную рыбалку быў затрыманы пракурор Петрыкаўскага раёна. І ў кастрычніку ж звольнілі начальніка Гомельскай абласной інспекцыі за «хібы ў працы». Выпадковае супадзенне? Можа, ужо былы начальнік абласной аховы прыроды пазбавіўся пасады як раз за тое, што «не выпусціў» пракурора?

Браканьерства ў «зоне» ўзаконяць?

Дарэчы, у Жалезніках, маленькай вёсцы каля Свяцілавічаў, хутка будзе, магчыма, вельмі сабе афіцыйная база для палявання і рыбалкі з усёй неабходнай інфраструктурай. Узводзяць у «зоне» гасцінічны комплекс для адпачынку, турызму, рыбалкі і палявання маскоўскія інвестары - браты Караткевічы, ураджэнцы Жалезнікаў.

У самой вёсцы мясцовых жыхароў можна пералічыць на пальцах рук. Масквічы Караткевічы пабудавалі ў вёсцы праваслаўную царкву, правялі вадаправод, зрабілі дарогу, выкапалі і зарыбілі сажалкі. У пачатку вёскі інвестары ўзвялі назіральную вежу, абсталявалі яе відэаназіраннем.

«Сістэма назірання палохае толькі тых, хто прывык жыць у гэтым краі вольна - страляць на «зоне» дзікіх жывёл, цягаць рыбу сеткамі, вазіць праз зону грузавікі з металаломам на Расею. Такім людзям сапраўды не патрэбныя ніякія «лішнія» назіранні за іх дзеяннямі», - тлумачыў раней прадстаўнік кампаніі-інвестара «Брыкбілд» Сяргей Кузьмянкоў.

Мясцовыя жыхары пярэчылі супраць варот у вёску, відэаназірання і гэтак далей.

«Наўрад ці ініцыятыва скаргаў ідзе ад мясцовых. Хто іх падбухторвае? Той, хто прывык тут парушаць закон так ці інакш. Ну, стаіць у нас тая брама на будаўніцтве, але мы дамовіліся з мясцовымі, што зробім там дамафон, і кожны будзе мець чып, каб прайсці там ці праехаць. Хіба што зламыснікі не праедуць, каб дзікоў біць ці царкву абрабаваць», - запэўніваў прадстаўнік будаўнічай кампаніі.

Так што, магчыма, расейскія турысты, якія атрымаюць магчымасць тут «законна» паляваць і рыбачыць, складуць канкурэнцыю правінцыйным начальнікам-аматарам пабегаць па чарнобыльскай зоне з стрэльбай.

Не ўпершыню

«Паляўнічыя справы» ў Гомельскай вобласці выстрэльваюць з падачы КДБ з перыядычнасцю не менш раз у пяць гадоў. Проста як падрыхтоўка да выбараў.

Так, у 2009 годзе КДБ ініцыяваў гучны паляўнічы скандал у Жлобінскім раёне. Скандал справакаваў і «разборкі» паміж КДБ і МУС, з пачаткам некалькіх крымінальных спраў.

У глухой вёсцы з адпаведнай назвай Глушыца знайшоўся паляўнічы маёнтак, куды прыязджалі культурна адпачыць мясцовыя начальнікі і міліцыянты. Усё было шыта-крыта, пакуль у 2009 годзе ў міліцыянтаў і чэкістаў не паўстаў канфлікт.

Супрацоўнікі міліцыі, а менавіта УБЭП, паспелі сабраць кампрамат на чэкістаў, але тыя выявіліся больш дасведчанымі, і страты панеслі міліцыянты. Іх абвінавацілі ў перавышэнні ўлады, якая заключалася ў арганізацыі незаконнага палявання. Справа дайшла да прэзідэнта. Гэта ён паведаміў народу, што міліцыянты і высокія начальнікі (у тым ліку і з БМЗ) захапілі лясныя ўгоддзі, незаконна там палявалі і нават рысь забілі.

Высокапастаўленыя міліцыянты пазбавіліся пасад, а некаторыя атрымалі рэальныя турэмныя тэрміны. Асуджаныя ўжо сваё адседзелі і выйшлі на волю.

Неўзабаве пасля тых разборак пяцігадовай даўнасці пазбавіўся пасады і генеральны дырэктар БМЗ.

Але гэтым «паляўнічая справа» ў Жлобіне не скончылася. Раз нельга паляваць незаконна - трэба гэта ўзаконіць.

Так, чыноўнікі пры дапамозе выканкамаўскай улады вырашылі засцерагчы свае тылы, каб надалей у жлобінскіх лясах можна было паляваць без аглядкі на КДБ і прэзідэнта. З гэтай мэтай была задуманаяя прыватызацыя КУП «Жлобінская паляўнічая гаспадарка». КДБ праверыў абставіны раздзяржаўлення і наступнай прыватызацыі камунальнага ўнітарнага прадпрыемства.

Выявілася, што новым уладальнікам гаспадаркі (50% +1 акцыя) стала нямецкая кампанія VGH Viktoria Garten Huttenindustriebedarf AG - адзін з асноўных партнёраў БМЗ. Кампанія з'яўляецца адным з вядучых экспарцёраў абсталявання і расходных матэрыялаў для прадпрыемстваў чорнай металургіі і ліцейнай прамысловасці. Цікава, што раней кампанія наогул не займалася турызмам або паляўнічымі справамі, а тут раптам вырашыла набыць такі няпрофільны актыў, адзначаў «Ежедневник».

Фігурантам справы з'яўляўся былы намеснік старшыні Жлобінскага райвыканкама, якому інкрымінавалі ўчыненне злачынства паводле ч.3 арт.424 КК (злоўжыванне ўладай або службовымі паўнамоцтвамі, учыненае службовай асобай, якая займае адказнае становішча, альбо пры выкананні функцый раздзяржаўлення ці прыватызацыі дзяржаўнай маёмасці, альбо якія пацягнулі цяжкія наступствы).

У 2010-2012 гадах, працуючы намеснікам старшыні райвыканкама, з карыслівай і іншай асабістай зацікаўленасці чыноўнік парушыў працэдуру раздзяржаўлення і прыватызацыі КУП «Жлобінскае паляўнічая гаспадарка», чым учыніў істотную шкоду дзяржаўным інтарэсам.

У прэс-службе КДБ паведамілі, што гэтая крымінальная справа ўсё яшчэ расследуецца, але следства ўжо знаходзіцца на завяршальным этапе. Іншыя падрабязнасці пакуль не выдаюцца.