На доме ў Менску вывесілі транспарант з патрабаваннем рамонту

У цэнтры Менска з'явілася расцяжка: "Дому 63 гады! Патрабуем капітальны рамонт!"

Расцяжку на свой дом №109 на праспекце Незалежнасці ля станцыі метро "Маскоўская" жыхары трохпавярхоўкі павесілі сёння раніцай. Ёю яны хочуць прыцягнуць увагу да праблемы свайго дома, паведамляе TUT.by.

"Ніхто з чыноўнікаў нас не чуе і не жадае ўнікаць. Таму мы вырашылі прыцягнуць увагу да дома такім чынам", - кажуць жыхары дома.

Нагадаем, у доме хочуць правесці мадэрнізацыю: надбудаваць два мансардных паверхі і зрабіць капрамонт. Пра гэта мясцовым жыхарам абвясцілі яшчэ ў 2010 годзе. Тады сваю згоду на такую мадэрнізацыю дала большасць уласнікаў жылля, і ЖРЭА Першамайскага раёна як заказчык рэканструкцыі заключыла дагавор на распрацоўку праектна-каштарыснай дакументацыі.

Але калі ў пачатку лістапада гэтага года жыхарам уручылі ўзоры дагавора на надбудову і капрамонт, многія з уладальнікаў кватэр выступілі катэгарычна супраць надбудовы мансард.

Людзі папрасілі не будаваць дадатковыя паверхі, а проста правесці ў доме 1951 пабудовы капрамонт.

Каб яшчэ раз унесці яснасць у сітуацыю, адміністрацыя раёна правяла сход з жыхарамі дома. На ім намеснік кіраўніка адміністрацыі Першамайскага раёна Дзмітрый Шашок катэгарычна заявіў, што надбудове ў доме быць. А без надбудовы капрамонту ім не відаць. Хоць з папер варта - той, хто будзе будаваць дадатковыя паверхі, плаціць мізэрную дзель - капрамонт робіцца ўсё-такі за кошт дзяржавы.

Жыхароў дома, якія выступалі супраць мансард, такое рашэнне не задаволіла, і яны павесілі на дом расцяжку.

- На тым сходзе нам так і не адказалі на нашыя пытанні з нагоды капрамонту без надбудовы мансарды, бяспекі, адсялення жыхароў на час рамонту і гэтак далей. Таму пасля сходу мы адправілі свае пытанні ў адміністрацыю Першамайскага раёна, ЖРЭА і Менгарвыканкам. Але нам прыйшоў адзін адказ: надбудову рабіць будуць, і вяртацца да гэтага пытання больш не будуць. А Дзяржкантроль даслаў паперу, што сход адбыўся, а далей яны не маюць кампетэнцыю ў гэтым разбірацца, - распавядае жыхарка дома Наталля. - Ніхто не хоча ўнікаць у нашую сітуацыю. Таму мы падрыхтавалі яшчэ адну паперу старшыні Дзяржкантролю з просьбай зрабіць дадатковы аналітычны кантроль і разабрацца ў нашай сітуацыі.

Паводле слоў жыхаркі дома, на сённяшні момант у доме з 24 уласнікаў 14 супраць надбудовы і хочуць, каб у доме правялі толькі капрамонт.

- У гэтых 14 уласнікаў, гэта значыць у нас, на 400 метраў квадратных ў доме больш, чым у тых, хто выступае за надбудову. Гэта значыць праект рэалізавацца не можа ў сувязі з тым, што работы ва ўмацаванні дома зрабіць не змогуць, - кажа жанчына. - Але ў выканкаме нам кажуць, што лічаць не па плошчы, а па колькасці уласнікаў. А паколькі ў доме ёсць камунальныя кватэры з некалькімі жыхарамі, за іх галасуе выканкам, які, вядома ж, за надбудову. Але мы не хочам разводзіцца з мужамі і паўналетніх дзяцей вылучаць на асобныя асабовыя рахункі, каб павялічыць колькасць уласнікаў.

Пакуль вярстаўся гэты матэрыял, да дому пад'ехала тэхніка, каб зняць расцяжку.

Але жыхары дома здавацца не хочуць і будуць звяртацца ў Менгарвыканкам з просьбай скасаваць пастанову аб надбудове і ўнесці дом у праграму капітальнага рамонту малапавярховых забудоў.