Апаненты Абамы абяцаюць блакаваць збліжэнне з Кубай

Ініцыятыва сенатараў з'яўляецца адказам на новую палітыку прэзідэнта Абамы, які назваў палітыку ізаляцыі Кубы памылкай.

Сенатары абяцаюць заблакаваць прызначэнне амбасадара на Кубу і пазбавіць фінансавання любыя праекты, накіраваныя на нармалізацыю адносін паміж дзвюма краінамі, інфармуе BBC.

Часткай працэсу нармалізацыі стала вызваленне з кубінскай турмы амерыканскага падрадчыка Алана Гроса і неназванага афіцэра выведкі. У адказ трое кубінцаў, якія абвінавачваліся ў шпіянажы, былі вызваленыя з турмы ў ЗША.

Туманныя перспектывы

У планах ЗША - адкрыць амбасаду на Кубе, спрыяць патоку амерыканскіх турыстаў на Кубу, развіваць банкаўскія сувязі і вызначыць гранічную суму наяўных, якую можна будзе перавесці з ЗША на Кубу.

Аднак толькі кангрэс мае права скасаваць эмбарга на гандаль з Кубай. Улічваючы тое, што прадстаўнікі Рэспубліканскай партыі скептычна настроеныя з нагоды новай палітыкі Абамы, карэспандэнты мяркуюць, што поўнамаштабныя змены ў адносінах паміж дзвюма краінамі адбудуцца не хутка.

Сярод праціўнікаў нармалізацыі - сенатар ад Дэмакратычнай партыі Роберт Менендэс, паводле ягоных слоў, глыбока расчараваны тым, што адбылося.

"Гэта памылка - меркаваць, што Куба зменіцца праз тое, што амерыканскі прэзідэнт раскрые абдымкі, а браты Кастра раптам расціснуць свае кулакі", - так пракаментаваў Менендэс ініцыятыву Абамы.

Сенатар ад Рэспубліканскай партыі Ліндсі Грэм паабяцаў заблакаваць фінансаванне палітычных ініцыятыў, накіраваных на нармалізацыю адносін, уключаючы адкрыццё амбасады.

У сваім твітэр-акаўнце Грэм назваў нармалізацыю адносін з Кубай дрэннай і несвоечасовай ідэяй.

У студзені Грэм стане старшынёй камітэта Кангрэса, які прымае рашэнне аб фінансаванні дзярждэпартамента.

"Здрада"

Сенатар ад Рэспубліканскай партыі Марка Рубіё ахарактарызаваў новыя адносіны з Кубай як "невытлумачальныя".

"Супакаенне братоў Кастра будзе толькі спрыяць таму, што іншыя тыраны - ад Каракаса да Тэгерана і Пхеньяна - убачаць, што могуць скарыстацца наіўнасцю прэзідэнта Абамы ў ягоныя апошнія два гады на прэзідэнцкім пасту", - заявіў Рубіё.

У інтэрв'ю СNN у сераду Рубіё заявіў, што пакідае за сабой права выкарыстоўваць усе магчымасці сенацкага заканадаўства, каб не дапусціць нават галасавання ў гэтым пытанні. У першую чаргу, гэта можа тычыцца галасавання з нагоды прызначэння амбасадара ЗША на Кубе.

З меркаваннем сенатараў згодныя кубінскія дысідэнты, якія жывуць у ЗША.

"Гэта здрада. Перамовы ідуць на руку толькі Кубе", - заявіў Карлас Мунос Фантаніл падчас дэманстрацыі ў Маямі.

Акно магчымасцей

Нягледзячы на апазіцыю сярод сенатараў, некаторыя эксперты мяркуюць, што прэзідэнт валодае дастатковай падтрымкай у кангрэсе.

Дырэктар лацінаамерыканскіх праграм у цэнтры Вільсана Сінція Арнсан лічыць важным тое, што многія прадстаўнікі Рэспубліканскай партыі займаюць нейтральную пазіцыю або не супрацьстаяць зменам.

У сваю чаргу, Томас Більбао, выконваючы дырэктар цэнтра даследавання Кубы (Cuba Study Group) адзначае, што на самалёце, на якім даставілі Алана Гроса ў ЗША, былі тры чальцы кангрэса, уключаючы сенатара-рэспубліканца з Арызоны Джэфа Флейка.

Паводле афіцыйных паведамленняў, у аўторак Абама і Кастра правялі тэлефонную размову, якая доўжылася амаль гадзіну. Гэта былі першыя перамовы на вышэйшым узроўні паміж дзвюма краінамі з 1959 года.

У абмен на Гроса і неназванага супрацоўніка выведкі Злучаныя Штаты вызвалілі трох кубінцаў, якія адбывалі доўгі турэмны тэрмін за шпіянаж.

Арышт Гроса пяць гадоў таму перапыніў папярэднюю спробу нармалізаваць адносіны паміж Кубай і ЗША.