Душан Угрын стаў галоўным трэнерам менскага «Дынама»

Чэшскі спецыяліст Душан Угрын змяніў галоўнага трэнера менскага "Дынама" Уладзіміра Жураўля.

Чэшскі спецыяліст Душан Угрын будзе новым галоўным трэнерам срэбных прызёраў чэмпіянату Беларусі футбалістаў менскага "Дынама", змяніўшы на пасадзе Уладзіміра Жураўля, паведамілі БелТА ў прэс-службе сталічнага клуба.

Кантракт з 47-гадовым чэшскім трэнерам, які сёння быў афіцыйна прадстаўлены камандзе, разлічаны на адзін год. Што да ягоных асістэнтаў, то іх імёны будуць названыя пазней.

Апошнім месцам працы Душана Угрына была чэшская "Вікторыя" (Пльзень), з якой ён у 2013 годзе стаў срэбным прызёрам нацыянальнага першынства. Да гэтага новаспечаны настаўнік уладальнікаў срэбра беларускага чэмпіянату-2014 узначальваў чэшскія клубы "Млада-Баляслаў" і "Багеміянс" (Прага), а таксама трэніраваў за мяжой - румынскія "Тымішаару" і "Клуж", кіпрскі АЕЛ (Лімасол) і грузінскае "Дынама "з Тбілісі.

Будучы гульцом, Душан Угрын выступаў у некалькіх не самых вядомых клубах на радзіме, а скончыў актыўную кар'еру ў 23 гады пасля цяжкай траўмы. Новы галоўнакамандуючы менскага "Дынама" з'яўляецца сынам Душана Угрына-старэйшага, які прывёў зборную Чэхіі да срэбра чэмпіянату Еўропы 1996 года.