Намеснік старшыні Вайсковага суду не прызнаўся ў атрыманні хабару

Юрыю Тузаву ставіцца ў віну атрыманне 20 тысяч даляраў хабару за скасаванне прысуду.

Палкоўнік юстыцыі і былы намеснік старшыні Вярхоўнага суда не прызнае сябе вінаватым. Пра гэта Юрый Тузаў заявіў у зале суда, паведамляе udf.by.

Другі фігурант крымінальнай справы Сяргей Шымчук, які абвінавачваецца ў пасярэдніцтве ў дачы хабару, сваю віну прызнаў цалкам.

Інкрымінуемыя абвінавачаным падзеі мелі месца вясной 2013 года.

Паводле версіі следства, у той час Вайсковы суд разглядаў справу нейкага Дварыновіча, асуджанага за карупцыйныя злачынствы Берасцейскім міжгарнізонным вайсковым судом да пяці гадоў пазбаўлення волі, канфіскацыі ўсёй маёмасці і штрафу ў 100 базавых велічынь. Асуджаны не з'яўляецца вайскоўцам. Ён праходзіў паводле справы, у якой адным з абвінавачаных быў супрацоўнік органаў памежнай службы.

Бацька асуджанага звярнуўся да Сяргея Шымчука, які з'яўляўся прыяцелем дзеючага тады намесніка старшыні суда - яны вучыліся разам на юрфаку БДУ. Шымчук перадаў Тузаву просьбу бацькі змякчыць прысуд асуджанаму, а таксама 20 тысяч даляраў узнагароды. У выніку прысуд у дачыненні да Дварыновіча быў скасаваны.

Грошы вайсковы суддзя атрымаў 24 красавіка 2013 пры сустрэчы з памагатым у адной з вёсак Валожынскага раёна.

Як гаворыцца ў абвінаваўчым заключэнні, змякчальных абставінаў што да Тузава не маецца. Абцяжарваючымі абставінамі з'яўляецца тое, што злачынства было здзейснена з карыслівай зацікаўленасці.

Што тычыцца Шымчука, то тут наадварот: абцяжарваючых абставін не ўстаноўлена, змякчальныя - садзейнічанне следству і малалетняе дзіця на ўтрыманні.