Акупаваны Крым пакінулі 19 тысяч чалавек
- 22.12.2014, 14:36
- 9,124
Больш за палову з іх складаюць крымскія татары.
Пра гэта заявіў упаўнаважаны прэзідэнта Украіны ў справах крымскататарскага народа Мустафа Джамілёў, паведамляе УНП.
«Мы абапіраемся на звесткі Вярхоўнага камісарыята ААН у справах бежанцаў... Там аперуюць лічбамі, што ў агульнай складанасці... з тэрыторыі Крыму і Севастопаля перайшло дзесьці прыкладна 19 тысяч чалавек і больш за палову з іх складаюць крымскія татары», - адзначыў Джамілёў.
Паводле звестак ААН, канфлікт ва Украіне прывёў да таго, што свае дамы пакінулі больш за 824000 чалавек. Каля 95% вымушаных перасяленцаў - з тэрыторый на ўсходзе Украіны, закранутых ваенным канфліктам.
У дадатак да перамешчаных асобаў у межах Украіны, паводле інфармацыі УВКБ, прыкладна 387 тысяч чалавек з'яўляюцца бежанцамі ў Расею, у той час як 6,6 тысяч звярнуліся з просьбай даць прытулак у Еўрапейскім звязе і 581 - у Беларусі.