Слава Рабіновіч: Мая вера ў поспех Украіны вяртаецца
18- 3.12.2014, 11:20
- 24,255
Прэзідэнт Украіны Пётр Парашэнка паступіў правільна, запрасіўшы на працу ва ўрад трох міністраў-замежнікаў.
Пра гэта напісаў у «Фэйсбуку» расейскі фінансіст, кіраўнік Diamond Age Capital Advisors Слава Рабіновіч.
На думку Рабіновіча, новыя прызначэнні «цуд цудоўны» і яго вера ва Украіну вяртаецца.
«З трох міністраў-замежнікаў я асабіста ведаю аднаго: грамадзяніна Літвы Айвараса Абрамавічуса, які заняў пасаду міністра эканомікі. Цалкам і цалкам падтрымліваю гэты выбар. Айварас шмат гадоў працаваў партфельным кiраўнiком у East Capital Asset Management AB, скандынаўскай кіруючай кампаніі, якая спецыялізуецца на інвестыцыях у краіны былога СССР. East Capital - адна з найбуйнейшых у свеце кампаній у кіраванні актывамі ў гэтым рэгіёне; пад яе кіраваннем - некалькі мільярдаў еўра. І ён - менавіта практык міжнародных фінансаў, фінансавых рынкаў, ён практык з Уол Стрыт», - паведаміў фінансіст.
Ён пажадаў поспехаў тром замежнікам, якія атрымалі пасады ва ўкраінскім ўрадзе, і пажадаў таго ж усім астатнім чальцам украінскага ўрада.
«А цяпер - за справу, міністры-капіталісты! На вас глядзяць не толькі ўкраінцы. Увесь свет. І ўсе прагрэсіўныя жыхары Расеі таксама», - падсумаваў ён.
Прызначаны міністрам эканомікі Украіны, ураджэнец Літвы Айварас Абрамавічус паабяцаў украінскім народным дэпутатам працаваць «па-еўрапейску».
Раней Вярхоўная Рада Украіны ўхваліла спіс кандыдатаў на пасады міністраў у новым урадзе.
Адпаведную пастанову падтрымалі 288 народных дэпутатаў.
У галасаванні не бралі ўдзел прадстаўнікі фракцыі «Апазіцыйны блок», якія пакінулі залу пасяджэнняў яшчэ да пачатку абмеркавання кандыдатур.