Аляксей Навальны прысуджаны да ўмоўнага тэрміну ў 3,5 гады
31- 30.12.2014, 9:38
- 25,308
Ягоны брат Алег Навальны - да рэальнага тэрміну ў 3,5 гады.
Прысуд вынес сёння раніцай Замаскварэцкі суд Масквы.
Аляксей і Алег Навальныя прызнаныя вінаватымі ў крадзяжы шляхам махлярства і легалізацыі грашовых сродкаў кампаніі «Ив Роше» і «Многопрофильная процессинговая компания», піша БелаПАН.
Аляксей Навальны прысуджаны да трох з паловай гадоў умоўна. Ягоны брат Алег атрымаў рэальны тэрмін. Як стала вядома напярэдадні, суд перанёс абвяшчэнне прысуду з 15 студзеня на 30 снежня. У самім судзе гэта патлумачылі тым, што суддзя Алена Каробчанка ўжо напісала прысуд фігурантам справы.
Дзяржабвінавачанне падчас спрэчак бакоў прасіла суд прызнаць братоў Навальных вінаватымі ў махлярстве і легалізацыі выкрадзеных сродкаў і прысудзіць Аляксея Навальнага да пакарання ў выглядзе 10 гадоў пазбаўлення волі з улікам прысуду па справе «Кировлеса», а Алега Навальнага - да васьмі гадоў зняволення.
Абарона настойвала на невінаватасці Навальнага і прасіла суд вынесці апраўдальны прысуд. На думку адвакатаў, крымінальная справа была распачатая з парушэннямі, так як адсутнічала заява пра шкоду, якая, з іх слоў, неабходная для расследавання спраў аб махлярстве.
Падсудныя звязваюць крымінальны пераслед з палітычнай дзейнасцю Аляксея Навальнага і заяўляюць аб неабгрунтаванасці прад'яўленых ім абвінавачванняў.
У 2013 годзе Аляксей Навальны ўдзельнічаў у выбарах мэра Масквы і ў верасні заняў другое месца, набраўшы 27% галасоў выбаршчыкаў.