Эрнст: Кола на Алімпіядзе не раскрылася праз ірландцаў
34- 5.12.2014, 10:09
- 37,179
Генеральны дырэктар расейскага «Першага канала» знайшоў вінаватых у інцыдэнту з нераскрытым алімпійскім колам.
Падчас адкрыцця Алімпійскіх гульняў паводле сцэнару пяць вялікіх сняжынак павінны былі ператварыцца ў алімпійскія колы, аднак па тэхнічных прычынах адна з іх не раскрылася. Канстанцін Эрнст мяркуе, што вінаватыя ў гэтым ірландскія спецыялісты, паведамляе BBC.
«Я потым расследаваў, ірландскія рыгеры (спецыялісты па абслугоўванні парашутнай тэхнікі), якія іх рабілі, ноччу выпусцілі адно кольца, і бачачы мяне, які не спаў пяты дзень, яны пабаяліся пра гэта сказаць», - распавёў Эрнст.
У эфіры расейскай тэлевізіі цырымонія ішла з невялікай затрымкай, і рэжысёры трансляцыі аператыўна замянілі кадры з кольцамі на здымкі з генеральнай рэпетыцыі, аднак інфармацыя аб накладцы хутка распаўсюдзілася праз інтэрнэт і стала аб'ектам жартаў.
«Калі мы ўбачылі, што кольца не раскрыліся, прынялі пастанову запусціць відэа з рэпетыцыі. Але гэта быў адзіны момант, калі давялося да гэтага звярнуцца. Для нас гэта не стала трагедыяй, - сказаў Эрнст пасля цырымоніі. - У дзэн-будыстаў ёсць думка: маеш ідэальна адпаліраваны шар, пакінь на ім шчарбіну, каб зразумець наколькі добра ён адпаліраваны. Колы былі самай простай рэччу ў тэхнічным плане. Яны апынуліся той самай шчарбінай.
За арганізацыю цырымоніі адкрыцця і закрыцця Алімпіяды Канстанцін Эрнст быў прызнаны чалавекам года паводле версіі часопіса GQ, а таксама атрымаў ордэн «За заслугі перад Айчынай» II ступені з рук расейскага прэзідэнта Уладзіміра Пуціна.
Зімовую Алімпіяду ў Сочы называлі самай дарагой у гісторыі: яе арганізацыя ацэньваецца ў 50 млрд даляраў, што больш, чым усе папярэднія зімовыя Гульні разам узятыя. Расейскі ўрад настойваў, што з бюджэту было выдаткавана толькі блізу 7 млрд даляраў.