Арастовіч: Расея помсціць Украіне за найбуйнейшы вайсковы правал

Усяго за апошнія дні расейскае войска страціла каля трохсот чалавек у Данбасе.

4 снежня расейска-тэрарыстычныя войскі нанеслі рэкордную колькасць удараў па ўкраінскіх сілавіках, у тым ліку па ўкраінскіх "кібаргах", якія абараняюць данецкі аэрапорт. Адбылося гэта практычна адначасова з выступам Уладзіміра Пуціна перад Федэральным сходам РФ.

Крэмль пачынае сапраўдную вайну супраць Украіны? Ці можна прагназаваць дзеянні расейскага правадыра? Ці пойдзе ён на поўнамаштабнае ўварванне? Ці патрэбны яму сёння сухапутны калідор у Крым, які выявіўся ў блакадзе? На гэтыя пытанні "Обозревателю" адказаў вайсковы экспэрт Аляксей Арастовіч.

- Чаму актывізаваліся атакі на данецкі аэрапорт, і чаму гэта адбылося пасля паслання Пуціна да Федэральнага сходу?

- Гэта звязана не з пасланнем Пуціна, а з вялізнымі стратамі, якія яны (расейцы і баевікі) панеслі перад гэтым, чатыры дні таму. Яны хочуць адпомсціць, бо яны панеслі беспрэцэдэнтныя страты. Гэта найбуйнейшы правал за ўсю найноўшую вайсковую гісторыю. Самае крутое з крутых спецпадраздзяленне "Вымпел" страціла 52 чалавекі забітымі. Усяго за апошнія дні яны страцілі каля трохсот чалавек забітымі.

- Можа быць, варта, нарэшце, назваць вайну вайной?

- Даўно варта. Паглядзіце, што робіць наша кіраўніцтва. Цяпер чачэнскія змагары за свабоду падымаюць паўстанне на Каўказе. Для нас гэта вельмі выгадна, бо Расея не справіцца з вайной на два фронты - не толькі таму, што сілаў не хопіць, колькі не хопіць арганізацыйных здольнасцяў. А нашы ідуць на замірэнне з 9 чысла. Гэта значыць, што яны спакойна перакінуць войскі на Каўказ, задушаць чачэнцаў і зноў вернуцца да нас.

Замест таго каб актывізавацца, мы дазваляем дабіць нашых саюзнікаў.

- Ці можна сёння спрагназаваць далейшыя дзеянні Пуціна?

- Я думаю, нейкія пэўныя тэндэнцыі прадбачыць можна. Ён будзе разгойдваць сітуацыю ва Украіне, выкарыстоўваючы натуральную незадаволенасць адсутнасцю рэформаў, эканамічным крызісам, палітычнымі супярэчнасцямі. Ён будзе ўкладаць вельмі шмат грошай у сваю агентуру, перакупляць чыноўнікаў, сварыць паміж сабой палітычныя партыі і гэтак далей. Тым больш, што ёсць матэрыял, на якім спакойна можна выклікаць сваркі.

Цяпер пачалася гонка. Пад ціскам эканамічных санкцый эканоміка Расеі дыхае на ладан. Да наступнай вясны ў эканоміцы РФ пачнуцца рэальныя вельмі вялікія праблемы, а да восені яна цалкам абрынецца. Гэта будзе катастрофа для Расеі, якая прывядзе да сур'ёзных працэсаў. У той жа час і ў нас з эканомікай не ўсё добра. Таму цяпер стаіць пытанне, хто каго "заэканоміць".

- Фактычна працягваецца блакада Крыма. Ці будзе Пуцін прабіваць сухапутны калідор?

- Пуцін можа пайсці на ўсё - што ў яго ў галаве, не ведае ніхто. Ён ужо некалькі разоў прызначаў уварванне, потым пераносіў. Але яны разумеюць, што не справяцца вайсковым шляхам - урок пад данецкім аэрапортам іх гэтаму навучыў. Таму, хутчэй за ўсё, яны будуць спрабаваць абвастраць сітуацыю.

А тое, што ён пяройдзе да паўнавартаснага наступу... Цалкам можа быць. Прынамсі, вайсковыя падрыхтоўкі менавіта такія. Тут ужо трэба палітычная пастанова. Але сітуацыя, у якой выявіўся Пуцін, - тупіковая. Які б ход ён ні распачаў, будзе толькі горш.

Калі ён будзе працягваць тую ж ваенную палітыку, гэта значыць, будуць страты, страты і страты. Калі пойдуць на ўварванне, гэта азначае, што супраць Расеі будуць уведзеныя санкцыі 144 узроўню - эканоміка падае не за дзевяць месяцаў, а за тры.

А што ён зробіць - паглядзім.

- Пуцін сёння адмаўляецца ад Крыму?

- У Крыме вельмі цяжкая сітуацыя, і пакуль незразумела, як яны з яе будуць выходзіць. Калі мы яшчэ адключым электраэнэргію і гэтак далей, то будзе наогул весела.

- Вы раіце ўкраінскай уладзе адключаць Крым?

- Вядома.

- Але ж там жывуць людзі, у тым ліку грамадзяне Украіны.

- Людзі ўсюды ёсць. Але тут пытанне гонкі эканомікі - якая эканоміка вытрымае. Калі мы адключым Крым, то будзе горш расейскай эканоміцы, а нам важна, каб яна абрынулася раней, чым наша эканоміка. У адваротным выпадку мы застанёмся не толькі без Крыму, але яшчэ і без паловы Украіны.

Гэта вайна, тут усе сродкі добрыя для таго, каб перамагчы. Гаворка ідзе пра існаванне нашай дзяржавы як такой. Гэта не жарты.

А людзі пацерпяць, людзі будуць праяўляць больш незадаволенасці ў дачыненні да расейцаў, якія прынялі іх у склад Расеі, і зусім не забяспечваюць.