Экс-кіраўнік службы бяспекі Кітая арыштаваны за карупцыю

Былы міністр грамадскай бяспекі КНР Чжоў Юнкан арыштаваны паводле абвінавачвання ў карупцыі і выключаны з партыі.

Пра гэта паведамляе BBC са спасылкай на кітайскія дзяржаўныя СМІ.

Гэта самы высокапастаўлены кітайскі чыноўнік, у дачыненні да якога распачатая крымінальная справа. Пра пачатак расследавання і арышт Чжоў Юнкана паведаміла Вярхоўная пракуратура Кітая.

Чжоў Юнкану выстаўленыя абвінавачванні ў некалькіх злачынствах і парушэннях, у тым ліку, як паведамляе афіцыйнае агенцтва Сіньхуа, у «сур'ёзным парушэнні партыйнай дысцыпліны», «атрыманні буйных хабараў», «раскрыцці партыйных і дзяржаўных сакрэтаў», а таксама ў «парушэнні шлюбнай вернасці з некалькімі жанчынамі», якімі суправаджаліся карупцыйныя ўгоды.

Да зыходу ў адстаўку Чжоў Юнкан узначальваў магутнае міністэрства кітайскай службы грамадскай бяспекі.

У функцыі гэтага міністэрства ўваходзяць унутраная разведка, контрразведка, абарона палітычнага і дзяржаўнага ладу, грамадскага парадку, вышэйшага кіраўніцтва дзяржавы і важных дзяржаўных аб'ектаў, а таксама выкананне паліцэйскіх функцый, антытэрарыстычная барацьба з экстрэмізмам і сепаратызмам на тэрыторыі Кітая.

Многія з былых калег і сваякоў Чжоў Юнкана таксама знаходзяцца пад следствам паводле абвінавачвання ў карупцыі.

Пасля прыходу да ўлады прэзідэнт Кітая Сі Цзіньпін пачаў гучную кампанію ў выкараненні карупцыю ў дзяржаўным і партыйным апараце.