Домрачава заняла пятае месца ў спрынце на этапе Кубка свету ў біятлоне
9- 6.12.2014, 18:47
- 16,573
Беларуская біятланістка заняла пятае месца ў спрынтарскай гонцы на 7,5 км на першым этапе Кубка свету ў шведскім Эстэрсундзе.
На двух агнявых рубяжах Дар'я Домрачава дапусціла адзін промах і саступіла лідару гонкі 9,5 секунды. Пераможцай стала Цірыл Экхоф з Нарвегіі. Другое месца ў Веранікі Віткавай з Чэхіі (4,6), трэцяе - у Кайсы Мякярайнен з Фінляндыі (7,6), паведамляе БелаПАН.
Надзея Пісарава з нулём у графе прамашкі фінішавала з 20-м вынікам, падзяліўшы гэты радок выніковага пратаколу з расеёкай Кацярынай Глазырынай - абедзве саступілі лідару 1 мін. 20,7 сек. Пры гэтым у Глазырынай адзін промах.
Анастасія Дубарэзава з трыма промахамі стала 54-й (2:19,4), Анастасія Каліна з двума промахамі фінішавала 70-й (2:46,0). Надзея Скардзіна, якая мела праблемы з вінтоўкай, дапусціла тры промахі і заняла выніковае 89-е месца (3:53,6).
Усяго ў гонцы прынялі ўдзел 97 біятланістак.