Парашэнка: Перамовы ў Менску трэба правесці як мага хутчэй
13- 8.12.2014, 9:29
- 7,445
Пасяджэнне кантактнай групы па Данбасу павінна адбыцца як мага хутчэй, каб ўжо 9 снежня дамагчыся спынення агню.
Пра гэта заявіў прэзідэнт Украіны Пётр Парашэнка падчас сустрэчы са спецыяльнай прадстаўніцай старшыні Арганізацыі бяспекі і супрацоўніцтва ў Еўропе Хайдзі Тальявіні.
Прадстаўніца АБСЕ, у сваю чаргу, адзначыла, што раней дасягнутыя на такіх сустрэчах кантактнай групы Менскія дамоўленасці, а менавіта пратакол ад 5 верасня і мемарандум ад 19 верасня, з'яўляюцца асновай для мірнага ўрэгулявання сітуацыі на Данбасе, і іх павінны выконваць усе бакі. Пра гэта сайту charter97.org паведамілі ў прэс-службе Пятра Парашэнкі.
Новая сустрэча Трохбаковай кантактнай групы пры ўдзеле прадстаўнікоў Украіны, Расеі і АБСЕ запланаваная ў Менску на 9 снежня. На папярэдніх такіх сустрэчах таксама прысутнічалі прадстаўнікі данецкіх і луганскіх сепаратыстаў. Але тэрарысты «ДНР» ужо заявілі, што да 9 снежня не паспеюць узгадніць шэраг важных пытанняў «са сваім кіраўніцтвам», і сустрэча, на іх думку, павінна адбыцца не раней чым 12 снежня.