Камітэт абароны журналістаў патрабуе спыніць блакаванне «Хартыі» і вызваліць Алесіна

Міжнародная праваабарончая арганізацыя звярнулася да беларускіх уладаў.

У заяве Камітэта абароны журналістаў паведамляецца аб новых рэпрэсіях супраць незалежных сайтаў у нашай краіне, а таксама аб арышце аглядальніка выдання «Беларусы і рынак» Аляксандра Алесіна. Арганізацыя нагадвае, што ён быў затрыманы КДБ і абвінавачаны ў шпіянажы.

«Аляксандр Алесін, рэпарцёр і вайсковы аналітык незалежнай газеты «Беларусы і рынак», прапаў без вестак і перастаў адказваць на яго тэлефон 25 лістапада. Сайта «Хартыі'97» паведаміў у чацвер са спасылкай на неназваныя крыніцы, што ён быў затрыманы супрацоўнікамі КДБ у кавярні ў Менску, дзе сустрэўся з сябрам», - гаворыцца ў паведамленні арганізацыі.

Калі Аляксандра Алесіна прызнаюць вінаватым, яго могуць пасадзіць у турму на тэрмін да 15 гадоў, нагадвае Камітэт абароны журналістаў.

«Аглядальнік вядомы аналітычнымі справаздачамі аб вайскова-прамысловым комплексе Беларусі, а таксама каментарамі аб падзеях і канфлікце ў суседняй Украіне. «Хартыі'97» ён распавёў аб размяшчэнні расейскіх вайсковых самалётаў і зенітна-ракетных комплексаў С-300», - гаворыцца ў заяве.

Наталля Радзіна, галоўная рэдактарка сайта «Хартыя'97», паведаміла Камітэту абароны журналістаў, што беларускія ўлады гатовыя заблакаваць рэсурс унутры краіны пачынаючы з 1 студзеня 2015 года. З яе слоў, Ігар Шуневіч, міністр унутраных спраў Беларусі, выказаў такі намер падчас пасяджэння ўрада ў чацвер, калі абмяркоўваліся меры ў барацьбе з распаўсюджваннем наркотыкаў і іншых забароненых рэчываў. Ён прапанаваў цалкам блакаваць доступ да вэб-сайтаў з «чорнага спісу», які ўключае ў сябе і «Хартыю'97».

«Мы заклікаем беларускія ўлады выключыць «Хартыю'97» са спісу «шкодных» вэб-сайтаў і спыніць рабіць перашкоды на шляху доступу да навінаў», - гаворыцца ў заяве Камітэта абароны журналістаў.