За хобі пінчука, што абмяняў машыну 27 разоў, падатковая патрабуе $220 тысяч

Абмен машын быў прыняты падатковай за прадпрымальніцтва.

Бізнэсовец мяркуе, што гэтае абвінавачанне - гэта прыкрыццё, пад якім канкурэнты чыняць над ім расправу, піша «Медыя-Палессе».

Калекцыя на мільярд

Да нядаўняга часу пінчук Сяргей Чыжык (на фота) быў цалкам паспяховым бізнэсоўцам. Былы вайсковец, дасведчаны работнік вытворчасці, ён наладзіў выпуск запатрабаванага не толькі ў Беларусі, але і ў краінах СНД, помпавага абсталявання, адкрыў працоўныя месцы ў вёсцы. У апошнія гады захапіўся аўтамабілямі. Ён не ездзіў за мяжу, не купляў іх і не прадаваў. Ён іх мяняў. За два з невялікім гады ў яго карыстанні пабывала блізу 27 аўтамабіляў розных марак. Вынік - распачынанне крымінальнай справы за незаконную прадпрымальніцкую дзейнасць і пагроза атрымаць турэмны тэрмін.

«Страсць да аўтамабіляў прыйшла да мяне нечакана, - распавядае Сяргей. - У 2012 годзе наважыў кінуць паліць. Каб адцягнуцца, падумаў змяніць машыну. Як у работніка вытворчасці, у мяне няма часу на паездкі на рынак, тым больш за мяжу, таму пастанавіў свой «Хундай Тэракан» 2003 абмяняць на іншы аўтамабіль, раўназначны коштам. Даў аб'яву. Мне прапанавалі «Мэрсэдэс Бэнс Е 220» 2004 года. Адбыўся абмен, пры якім я даплаціў суму, эквівалентную 2 000 даляраў».

Паездзіўшы на «Мэрсэдэсе», Сяргей абмяняў яго на «Ленд Ровер Дыскаверы 2», даплаціўшы пры гэтым уладальніку ў эквіваленце 700 даляраў. Яго, у сваю чаргу, - на БМВ-745 2003 года, зноў-такі з даплатай у эквіваленце 2 000 даляраў.

І панеслася. Сяргей мяняў адзін аўтамабілі за адным. Часам, як кажа ён сам, аўтамабіль і тыдзень у яго не затрымліваўся. «Самае цікавае, што такіх, як я, шмат», - канстатуе Сяргей.

Даплата ажыццяўлялася бакамі, калі аўтамабілі былі нераўназначныя коштам. За ўвесь час Чыжык даплаціў блізу 100 млн рублёў. Продажам і рэалізацыяй аўтамабіляў ён не займаўся. Праз МРЭА за 2 гады аформіў 7 машын, частку з іх - на жонку.

На персанальным кампутары Сяргей ствараў тэчку па кожнаму аўто, змяшчаў туды фатаграфіі, файлы з пазнакамі. Гэтую інфармацыю вынялі з кампутара падчас ператрусу ў доме бізнэсоўцы. Па ёй жа следчыя міжраённага аддзела СК устанавілі ўсіх аўтааматараў, якія рабілі абмены з Чыжыкам, і дапыталі ў якасці сведак.

Калі інфармацыя па абмене аўтамабіляў паступіла ў ІМПЗ Пінскага раёна, Сяргею і ягонай жонцы прад'явілі патрабаванне падаць дэкларацыю аб даходах і выдатках за 2010-2013 гады. Чыжык заплацілі належныя падаткі.

«Пры падачы дэкларацыі прама на калідоры адна з чыноўніц пры старонніх абвінаваціла мяне ў атрыманні даходаў больш чым 400 мільёнаў, на падвышаных танах сказала, што накіруе гэтую інфармацыю ў УДФР Берасцейскай вобласці, што ў далейшым і зрабіла», - распавядае Сяргей.

У міжраённым аддзеле УДФР КДК РБ Берасцейскай вобласці Чыжык паказалі, што ёсць факт занятку ім незаконнай прадпрымальніцкай дзейнасцю, прапанавалі выплаціць у добраахвотным парадку 100 млн рублёў у бюджэт. «Я адказаў, што ніякага прыбытку ад сваёй дзейнасці не атрымліваў, што гэта толькі маё хобі, лад жыцця. Такіх грошай у мяне няма - гэта гадавы мой заробак».

І справу распачалі «ў сувязі з незаконным атрыманнем прыбытку ў суме 173 млн рублёў». Санкцыямі прадугледжана пакаранне аж да пазбаўлення волі на тэрмін да пяці гадоў. Усе, абмененыя аўтамабілі залічылі ў прыбытак, сума якога склала 2 437 752 340 рублёў.

На ўсю маёмасць, наклалі арышт. Больш за тое - арыштавалі 30% акцый ЗАТ «Пінапомпапрам», якія належаць Сяргею Чыжыку.

Хобі коштам у бізнэс

ЗАТ «Пінапомпапрам», дырэктарам якога з'яўляецца Чыжык, зарэгістраванае ў чэрвені 2012 года. Пачынаў ён з таго, што, закасаўшы рукавы, сам касіў, чысціў-прыбіраў, станкі закупляў і ўсталёўваў. У кароткі час Чыжык наладзіў серыйны выпуск помпаў, рэдуктараў, тым самым стварыўшы канкурэнцыю на рынку не толькі ў Беларусі, але і Расеі. Завод дазволіў стварыць 18 працоўных месцаў у сельскай мясцовасці. У лепшыя часы абарот «Пінапомпапрам», складаў 300 млн рублёў у месяц. Падаткі, заробак, іншыя адлічэнні кіраўнік выплачваў без затрымкі.

«Пасля таго, як арыштавалі мае акцыі, - распавядае Сяргей Аляксеевіч. - Мы апынуліся ў цяжкім становішчы. Інвестар прыпыніў усялякую дапамогу, скараціліся рынкі збыту... З цяжкасцю выжываем».

На сённяшні дзень заробак на прадпрыемстве складае 2,5 млн рублёў. Прычым, аднолькавы ён і ў працоўных, і ў дырэктара.

«Мяркую, што крымінальны пераслед - чыясьці асабістая зацікаўленасць, - робіць выснову Сяргей Чыжык. - Паколькі арыштаваныя акцыі, нанеселі шкоду эканамічнаму стану ЗАТ «Пінапомпапрам», інвестар адмовіўся развіваць прадпрыемства. Выпуск помпаў знізіўся, а па некаторых пазіцыях спыніўся, адбылося скарачэнне супрацоўнікаў, знізілася выплата падатковых адлічэнняў у бюджэт».

ЗАТ «Пінапомпапрам» планавала пашырацца і запусціць ліцейную вытворчасць. Для гэтага ёсць пустуючы цэх і 2 гектары зямлі. Прадпрыемства развівалася і мела перспектывы.

«Я нічога супрацьзаконнага не рабіў, - кажа Сяргей. - У мяне звычайны аднапавярховы дом, які я сам пабудаваў. І жывем мы на заробак. Але, мабыць, хтосьці надумаў, што ў мяне даходы казачныя. Вядома, калі б я мог выказаць здагадку, у што выльецца маё захапленне, не займаўся б гэтым. Але ў маім разуменні абмяняцца машынай - гэта тое ж самае, што абмяняцца, скажам, кнігай, карцінай, іншай рэччу».