Forbes: Канфлікт ва Украіне пакладзе канец уладзе Пуціна

Расейскаму прэзідэнту няма куды бегчы з краіны, таму ён можа пайсці на развязванне новых войнаў.

Канфлікт на Усходзе Украіны завершыцца адхіленнем прэзідэнта Расеі Уладзіміра Пуціна ад улады. І гэта адбудзецца таму, што ён не правільна ацаніў прагнозы адносна Крыма і Украіны.

Пра гэта на старонках Forbes піша Аві Цемкін, які заўважае, што расейскі прэзідэнт пачаў канфліктаваць з Захадам яшчэ да таго, як ягоныя войскі захапілі Крым і зладзілі вайну ў Данбасе. Ён даў палітычны прытулак былому супрацоўніку спецслужбаў ЗША Эдварду Сноўдену і гэтым самым наладзіў супраць сябе амерыканскую палітычную і вайсковую эліту, піша zn.ua.

А рэакцыя Пуціна на збіванне авіялайнера "Боінг 777", у падзенні якога ён абвінаваціў Украіну, толькі пагоршыла становішча ягонага ўжо падарванага аўтарытэту.

"Пуцін памылкова лічыў, што Захад палітычна слабы, а ЗША і прэзідэнту Бараку Абаму не хапае рашучасці і мэтанакіраванасці. Таму амерыканцы будуць трываць любыя агрэсіўныя ўчынкі Расеі", - гаворыцца ў артыкуле.

Менавіта праз няправільную ацэнку сітуацыі расейская эканоміка апынулася пад ціскам і пагрозай дэфолту. На думку аглядальніка, Пуцін бачыць Расею не такой, якой яна ёсць на самой справе. Пра гэта сведчыць імклівае скарачэнне эканомікі краіны. Праз фінансавыя цяжкасці становіцца відавочным раскол у асяроддзі прэзідэнта Расеі.

"Сілавікі і алігархі супрацьстаяць адзін аднаму. Але абодва лагеры разумеюць, што Пуцін быў актывам, які калісьці іх узбагачаў. А цяпер ён становіцца страшным цяжарам", - гаворыцца ў артыкуле.

На думку аўтара, у бліжэйшы час Расея наблізіцца да той мяжы, калі стане зразумела, што агрэсіўная знешняя палітыка Пуціна толькі шкодзіць Расеі і адкідвае яе ў змрочнае савецкае мінулае.

"Усё гэта хутчэй рана, чым позна, прывядзе да адхілення Пуціна ад улады. Гэта адбудзецца альбо шляхам перавароту ў рамках дзейнай сістэмы ўлады, або шляхам "каляровай рэвалюцыі", - піша аглядальнік.

У гэты ж час, ён дадае, што рэжым Пуціна наўрад ці пагодзіцца спакойна і мірна сысці. Расейскаму прэзідэнту няма куды бегчы. Таму ён можа выбраць вайну. Не выключана таксама, што Пуцін пойдзе далей за межы Украіны і дазволіць канфлікт у Балтыі. У прыватнасці, ён можа паўтарыць крымскі сцэнар у эстонскім горадзе Нарва. Рэспубліканская газета Washington Times пісала, што Пуцін слабее, але не спыніцца праз адчай і эканамічныя праблемы.

Нядаўна канцлер Нямеччыны Ангела Меркель абвінаваціла Пуціна ў "стварэнні праблем" у Еўропе. Яна прыгадала расейскаму прэзідэнту не толькі канфлікт ва Украіне, але і ў Грузіі і Малдове. У гэты ж час, эканамічныя цяжкасці ціснуць на рэжым прэзідэнта Расеі. Пуцін больш не можа выменьваць свабоду расейцаў на заробкі.

Фота: AP