Правілы паступлення ў ВНУ «захраслі» ў адміністрацыі Лукашэнкі

Навучальны год даўно пераваліў за сярэдзіну, а правілы паступлення ў ВНУ для кампаніі-2014 да гэтага часу не апублікаваныя.

Іх рэдакцыя, прапанаваная Міністэрствам адукацыі, ніяк не знойдзе адабрэння ў адміністрацыі Лукашэнкі, пішуць «Белорусские новости».

З году ў год паўтараецца ў Беларусі адно і тое ж: спачатку чыноўнікі кажуць пра неабходнасць змяніць правілы паступлення ў ВНУ, затым цягнуць ці ледзь не да чацвёртай чвэрці навучальнага года і прымаюць іх практычна без змен. Не выключана, што ў гэтым годзе ўсё паўторыцца.

Старшыня Дзяржкамісіі па кантролі за ходам падрыхтоўкі і правядзення ўступных выпрабаванняў ва ўстановах вышэйшай і сярэдняй спецыяльнай адукацыі Анатоль Рубінаў яшчэ ў жніўні казаў, што пытанне з новымі правіламі трэба вырашыць загадзя.

«Мы рэкамендуем Мінадукацыі і просім прэзідэнта зацвердзіць новыя правілы паступлення ў ВНУ да лістапада, - адзначаў Рубінаў. - Каб не атрымалася так, што мы напярэдадні новай уступнай кампаніі пачнем іх мяняць. Трэба зрабіць гэта загадзя, каб людзі паглядзелі, вывучылі і прызвычаіліся да зменаў».

17 снежня міністр адукацыі Сяргей Маскевіч заявіў, што новыя правілы паступлення ў ВНУ вось-вось будуць перададзеныя на подпіс Аляксандру Лукашэнку.

«Сёння мы яшчэ раз аналізуем, разглядаем, абмяркоўваем (правілы) на ўзроўні ўрада, адміністрацыі прэзідэнта, - адзначыў міністр. - Мяркую, што літаральна ў бліжэйшыя дні дакумент будзе непасрэдна накіраваны кіраўніку дзяржавы».

Сяргей Маскевіч не паведаміў, якія менавіта змены ўтрымліваюць новыя правілы, аднак падкрэсліў, што абітурыентам, якія маюць намер удзельнічаць ва ўступнай кампаніі 2014 года, не давядзецца мяняць план падрыхтоўкі.

На думку Анатоля Рубінава, беларускім ВНУ неабходна адмовіцца ад паасобнага конкурсу для гарадскіх і сельскіх абітурыентаў, а таксама ад льгот на паступленне для дзяцей-сірот і іншых катэгорый абітурыентаў, адзначыўшы, што льготы павінны быць матэрыяльнымі.

Акрамя таго, лічыць кіраўнік дзяржкамісіі, вызначальную ролю пры паступленні ў ВНУ павінны гуляць вынікі экзаменаў па профільных прадметах, а парадак залічэння абітурыентаў на спецыяльнасці сферы культуры і мастацтва неабходна ўніфікаваць.

Таксама мяркуецца, што адным з новаўвядзенняў можа стаць магчымасць залічэння ў педагагічныя ВНУ без экзаменаў медалістаў і пераможцаў алімпіяд.

Аднак ні адзін, ні другі чыноўнік з тэрмінамі прыняцця правілаў паступлення ў ВНУ не здагадаліся. Да таго ж, як паведамілі ў Мінадукацыі, праца над дакументам усё яшчэ працягваецца.

Як адзначыла намеснік начальніка ўпраўлення вышэйшай адукацыі Святлана Міхневіч, «юрысты Мінадукацыі і Адміністрацыя прэзідэнта прапрацоўваюць некаторыя моманты». Паводле яе слоў, ведамства пастаянна адказвае на розныя пытанні, якія паступаюць з адміністрацыі Лукашэнкі з нагоды новай рэдакцыі правілаў.

На пытанне, ці не з'явяцца раптам у новых правілах такія змены, якія акажуць значны ўплыў на ўмовы паступлення ў ВНУ, Святлана Міхневіч адказала, што канчатковае рашэнне прымае не Мінадукацыі.

У адміністрацыі ж Лукашэнкі ад каментароў устрымаліся.

Затое ўжо апублікаваныя праграмы ўступных выпрабаванняў для тых, хто паступае ва ўстановы сярэдняй спецыяльнай або вышэйшай адукацыі. Такім чынам, кажуць чыноўнікі Мінадукацыі, абітурыентам можна спакойна рыхтавацца.

Аднак спакойна рыхтавацца неяк не атрымліваецца, адзначыў у каментары рэпетытар Яўген Лівянт. «З году ў год абітурыентаў трымаюць у напружанні і дэманструюць да іх непавагу», - лічыць ён. Да таго ж, абмеркаванне зменаў адбываецца за зачыненымі дзвярыма, тады як правілы тычацца вялікай колькасці людзей.

«Гэта ўжо нават не смешна, - кажа Яўген Лівянт. - Кожны год Міністэрства адукацыі абяцае прыняць правілы восенню, а прымаюць іх у студзені. Мяркуючы па ўсім, у гэтым годзе мы ідзем на рэкорд. У выніку сур'ёзна такіх кіраўнікоў ніхто не ўспрымае. Спадзяюся, што прынцыпова нічога не зменіцца, бо не хацелася б даведацца пра значныя змены ў правілах за чатыры месяцы да ЦТ».