Сын кіраўніка МУС Кубы ўцёк у ЗША

Хасуе Каломе Васкес, сын міністра ўнутраных спраў Кубы Абеларда Каломе Ібара, уцёк у Злучаныя Штаты і папрасіў там прытулку.

Ён бег праз Мексіку, перасёк краіну і дабраўся да мяжы з ЗША. Цяпер сын кубінскага міністра знаходзіцца ў Маямі у сваёй маці Суры Васкес Руіс, былой жонкі кіраўніка МУС Кубы.

Тое, што Каломе Васкес уцёк, даказваюць і фатаграфіі на яго старонцы ў Facebook. На здымках сын кіраўніка МУС паказаны ў некалькіх месцах Маямі - на пляжы, у спартыўнай зале, на вуліцы на фоне чужога аўтамабіля, адзначае выданне Маямі CaféFuerte.

75-гадовы генерал Каломе Ібара па мянушцы Пухнаты з'яўляецца адной з самых высокапастаўленых фігур, якая карыстаецца найбольшым даверам у структуры ўлады на Кубе. Ён ваяваў на Другім Усходнім Фронце пад камандаваннем Рауля Кастра. Пасля рэвалюцыйнага трыумфу ў 1959 годзе ён далучыўся да Службы ваеннай выведкі паўстанцаў. Каломе Ібара - віцэ-прэзідэнт Дзяржаўнага савета і носіць тытул Героя Рэспублікі Куба, паведамляе Havana Times.

У апошні час уцякаць у ЗША стала папулярным сярод дзяцей і блізкіх сваякоў галоўных фігур у кіраўніцтве Кубы, піша NEWSru.com.

У жніўні 2012 года Гленда Мурыла Дыяс, дачка міністра эканомікі і планавання Марына Мурылья Хорхе, пераехала ў Тампу, Флорыда.

Пабла Эрнэста Рэмірэс дэ Эстэнас Семідэт пераехаў у Маямі. Яго бацька - Фернанда Рэмірэс дэ Эстэнас, былы намеснік міністра замежных спраў і кіраўнік дыпламатычнай місіі Кубы ў Вашынгтоне з 1995 да 2001, паведамляе Anchorage Daily News.

Яшчэ перасяліўся ў ЗША Алехандра Луіс Барэіра Агрэла, 25-гадовы сын былога начальніка Упраўлення выведкі Луіса Барэіра Карамеса, прыбыў у Маямі ў верасні 2012 года.

З укараненнем новай іміграцыйнай палітыкі кубінцы, якія трапляюць у ЗША, могуць прасіць месца жыхарства на адзін год і дзень, згодна з кубінскім законам аб рэгуляванні, не губляючы свайго месца жыхарства на Кубе.