Януковіч патрабуе правесці «рэферэндумы» ва ўсіх рэгіёнах Украіны

Збеглы экс-прэзідэнт Украіны выступіў са зваротам да ўкраінскага народу.

Характэрна, што Януковіч не з'явіўся на публіцы, а перадаў свой зварот расейскім СМІ.

«Як прэзідэнт, які з вамі думкамі і душой, заклікаю кожнага разважнага грамадзяніна Украіны - не дайце самазванцам вас выкарыстоўваць! Патрабуйце правядзення «рэфэрэндуму» аб вызначэнні статусу кожнага рэгіёну ў складзе Украіны», - гаворыцца ў звароце Віктара Януковіча, які паступіў у ІТАР-ТАСС.

«Толькі ўсеўкраінскі «рэферэндум», а не экстранныя датэрміновыя выбары прэзідэнта могуць у значнай ступені стабілізаваць палітычную сітуацыю і захаваць суверэнітэт і цэласнасць Украіны», - лічыць Януковіч.

«Цяперашняя так званая улада прыняла пакет законаў, якія наўпрост парушаюць Канстытуцыю Украіны. Гэтыя законы былі прынятыя пад ціскам Майдана. Над многімі народнымі дэпутатамі і іх сем'ямі здзяйсняліся акты гвалту, не кажучы ўжо пра пастаянныя пагрозы», - гаворыцца ў яго звароце.

Ён назваў «усё, што адбывалася і адбываецца ў апошнія месяцы ва Украіне» - «узброеным дзяржаўным пераваротам, які быў здзейснены апазіцыяй на зброі тэрарыстычных груповак пры поўнай падтрымцы некаторых заходніх дзяржаў».

«Абсалютна лагічна, што пратэст, які разгараецца на Паўднёва-Усходзе Украіны - гэта натуральная рэакцыя густанаселенага прамысловага краю на ўзброены дзяржаўны пераварот», - заявіў ён.

«Самазванцы не маюць мандата даверу ўкраінскага народа, не маюць права пазбаўляць кожнага грамадзяніна Украіны яго права голасу, шляхам унясення антыканстытуцыйных змяненняў у заканадаўства, у тым ліку і аб выбарах прэзідэнта», - падкрэсліў Януковіч.

«Анархія, якія робяцца на вуліцах нашай краіны, не мае нічога агульнага з дэмакратыяй», - заявіў ён. «Няхай хоць адна заходняя дзяржава назаве дэмакратычнымі крокі, што прымаюцца цяперашнімі «кіраўнікамі». Не думаю, што хтосьці з еўрапейскіх чыноўнікаў высокага рангу публічна прызнае нармальным расстрэлы і рабаванні на вуліцах іх дзяржаў, калі тэрарысты называюцца актывістамі, якім беспакарана дазволена забіваць і рабаваць людзей», - сказаў Януковіч.

Таксама ў звароце да з'езду «Партыі рэгіёнаў» ён папрасіў зняць з яго паўнамоцтвы ганаровага старшыні партыі і выключыць яго з яе.

Нагадаем, што былы прэзідэнт Украіны пакінуў краіну пасля акцый пратэсту на Майдане. Ва Украіне Віктара Януковіча абвінавачваюць у дачыненні да масавых забойстваў падчас акцый пратэсту. Зрынуты прэзідэнт абвешчаны ў міжнародны вышук. Акрамя яго, па справе адшукваюцца яшчэ 24 палітыка.

Фота: Reuters